Osang nangayo og sorry sa mga maestra

CEBU, Philippines - Nangayo karon og pasaylo si  Rosanna Roces ngadto sa mga maestra  kinsa  nasabyagan niya  og dili maayong  mga pulong sa dihang nagsilbi kini isip hurado  sa usa ka episode sa  Showtime sa ABS-CBN.

Ang maong programa gi-suspenso og 20 ka adlaw sa Movie and Television Review and Classification Board tungod sa gibuhat ni Osang.

Mapasalamaton si Osang nga gitagaan siya og higayon sa Dos nga makapangayo og pasaylo ngadto sa mga magtutudlo nga nasakitan sa iyang gipang-lenggua.

“Nagpapasalamat ako sa ABS-CBN dahil binigyan nila ako ng pagkakataong humingi ng paumanhin sa aking naging pahayag sa Showtime. Naramdaman kong nakahanap ako ng tunay na kapamilya sa ABS-CBN dahil hindi nila ako iniwan sa ere. Kung sa ibang network, gaya ng naranasan ko noon, ay iniwan ako at pinabayaang magpaliwanag mag-isa,” nagkanayon ang aktres.

Sa laing bahin, barogan gihapon sa   MTRCB ang kasamtangan nila nga desisyon ug karong adlawa mao ang gikatakdang hearing kabahin sa maong isyu.

Juday ug Sarah: Hating Kapatid seguradong mo-click

Aminado ang mga bida sa Hating Kapatid nga sila si Judy Ann Santos ug Sarah Geronimo nga seguradong mo-click sa publiko ang ilang pelikula tungod sa lig-on nila nga tandem.

“Blessing na naman from God na makatrabaho ko ang nag-iisang Judy Ann Santos. It’s a big, big challenge,” nagkanayon si Sarah.

Nasuwayan na ang katakos sa duha sa nangagi nila nga mga pelikula busa gipanglantawan sa ilang mga fans nga dili gyud maglisod ang ilang direktor nga si   Wenn Deramas sa paghatag og instruction kanila.  

Samtang gipadayag ni Juday nga dali ra sila nga nagka-close ni Sarah kinsa gihulagway niya nga usa ka buotan ug talented nga pagkatawo hinungdan nga saludo siya niini.

“I’m just hoping that the concept will suit our tandem and that the audience will appreciate it,” butyag pa ni Juday. 

30th Cebu Pop: Panagtapok sa mga hugyaw

Mahitabo na ugmang adlawa , Enero 15 ang   ika-30 ka tuig nga anibersaryo sa Cebu Popular Music Festival nga maoy usa sa nagsilbi nga yawe sa pag-ugmad sa binisayang awit.

Ang maong giatngan nga kalihukan naandan na matag tuig sa ikatulong Biyernes sa buwan sa Enero , ug ugmang adlawa usa ka bonggang Cebu Popular Music Festival ang masaksihan sa New Cebu Coliseum, sa alas 7:30 sa gabii.

Niining higayona, masaksihan ang hugyaw nga konsyerto sanglit subling tagaan og kinabuhi ang tanang komposisyon nga midaog sa Cebu Pop sa milabay nga mga katuigan.

Masaksihan usab ugma ang pagbalik ni Sharon Magdayao nga nailhan na karon sa tibouk nasud isip Vina Morales .

Nagpangedaron pa lang og otso anyos si Vina sa dihang midaug sa maong kompetisyon niadtong 1987 pinaagi sa iyang awit nga Paglaum: Kabataan nga tinagik Fr. Fritz Malinao nga  taga Bogo, Cebu. 

Ang nahisgutang kalihukan gipasiugdahan sa   Cebu Arts Foundation, Inc. diin tumong usab niini ang pag-preserba sa Kulturang Sugbuanon partikular na sa natad sa Original Cebuano Songwriting ug kini mahitabo gyud matag tuig isip kabahin sa naglinya nga mga kalingawan sa kapistahan ni Sr. Sto. Niño.

Reena Malinao napili isip Miss Cebu 2010

Nalangkat sa 21-anyos nga si Reena Elena Malinao ang titulong Miss Cebu 2010 nga gipahigayon niadtong Martes sa gabii sa Waterfront Hotel and Casino -Lahug.

Giangkon ni Reena nga mabinantayon na siya kanunay sa iyang mga lihok gumikan sa bag-ong titulo nga iyang nahuptan.

 “Wa man gyud ko ga-expect , ang pagsulod pa lang daan sa Top 5 kay dako na kaayo nga blessing alang kanako,”   nagkanayon si Reena.

Gradwado si Reena sa kursong Bachelor of Science in Nursing sa Cebu Normal University ug dako usab siya og pasalamat sa dakong suporta nga gihatag sa iyang pamilya sa pag-apil niya sa Ms. Cebu .

Gawas kang Reena, nakaangkon usab og mga titulo sila si Maria Gresa M. Lugo (1st Runner Up), Maria Eliza R. Zosa (2nd Runner-up), Rogelie A. Catacutan 3rd Runner-up ug Carole Monique A. De Leon (4th Runner-up).

Angel isip Gregoria de Jesus

Excited na si Angel Locsin nga mo-portray sa kinabuhi ni Gregoria de Jesus alang sa usa ka documentary drama nga himoon sa banggiitang direktor nga si Mario O’Hara.

Si Gregoria de Jesus maoy asawa sa bayani nga si Andres Bonifacio ug ang maong proyekto nag-ulohan og “Ang Paglilitis”.

“Maganda po ‘yan. Kasi, ngayon po, hindi na alam ng marami ang ating history. I want to be part of a film na nagpapaalala sa ating kasaysayan na hindi pa natin alam,” nagkanayon si Angel sa dihang nahinabi sa ABS-CBN News.

Edu suportado sa GKNB players

Matud pa nga suportado karon ang vice presidentiable nga si Edu Manzano sa nangaging players sa kanhi show niya sa ABS-CBN nga “Game Ka Na Ba?”. Ang maong mga tawo nagtukod og grupo aron motabang sa kandidatura sa aktor pinaagi sa ilang mga account sa Facebook, Twitter ug Friendster.

LJ ganahan magkomedyante

Interesado si    LJ Reyes sa comedy world busa siya ang gihimong guest sa    “Bubble Gang” ugma sa gabii. Nagkanayon ang aktres nga oras na alang masukod pud ang iyang abilidad sa pagkomedya atubangan sa kamera

Sweet na-ospital

Gidala kagahapon sa Emergency Room sa St. Luke’s Hospital si John Sweet Lapus tungod sa sobrang ubo nga iyang gihambin human sa iyang taping sa Full House.

James ug Kris nag-duet sa Araneta

Nagsyinagitay ang tanang tawo sa special song number sa magtiayong James Yap ug Kris Aquino atol sa birthday concert ni Sharon Cuneta sa Araneta Coliseum niadtong Martes sa gabii. Una kining higayon nga mikanta si James sa entablado.

Way sapaway

Gipaneguro ni Melissa Ricks nga way sapaway nga mahitabo sa mga eksena nga himoon tali nila ni Erich Gonzales sa seryeng Tanging Yaman. Nagkasuod na og maayo ang duha ka aktres sukad sila nagkauban sa maong programa.

Tumoy sa kalendaryo

Gisungog karon si Marvin Agustin sa iyang mga higala og tiguwang ug naa na sa tumoy sa kalendaryo gumikan kay mo-31 na siya karong January 29.

Kim naikog ni Kris

Gikatahong pinangga kaayo   ni   Kris Aquino si Kim Chiu sa set sa serye nila nga “Kung Tayo’y Magkakalayo” . Gitambagan sa TV host si Kim nga dili maikog sa himoon nila nga mga eksena . Usa na niini ang eksena nga gitukmod siya ni Kim pero nabati niya nga medyo naikog pa ang aktres sa paghimo sa maong butang.

Joross pasok sa SRO

Human sa First Love, giandam na usab sa GMA-7 ang ikaduhang proyekto alang sa bag-o nila nga talent nga si Joross Gamboa ug kini mao ang SRO Cinemaserye February episode.

RR ug Valerie gisaway

Napuno karon sa mga pagsaway ang Wowowee hosts nga sila si RR Enriquez ug Valerie Concepcion gumikan kay nasobraan ra ka-sexy ang ilang gipanul-ob sa maong programa.

APO moretiro na

Gipadayag sa grupong   APO Hiking Society nga human sa ilang konsyerto karong Mayo, kay moretiro na sila sa music industry kay atimanon na usab nila ang tagsa-tagsa nila ka mga kinabuhi.