2009: Kamatayon, Panagbuwag,Eskandalo, Kalampusan

Death of Douglas Quijano

CEBU, Philippines - Gibati og tumang kaguol ang Philippine Artists Managers, Inc. (PAMI) sa dihang nawad-an kini og usa sa ilang mga founding members gumikan sa kalit nga pagtaliwan ni Douglas Quijano. Si Douglas ang kanhi manager sa pipila ka mga sikat karon nga mga artista sama nila ni Janice De Belen, Geli De Belen, Carmina Villaroel, Richard Gomez, Wendell Ramos, ug uban.

Goodbye Francis M

Marso 6, mitaliwan ang giisip nga Philippines’ Master Rapper human sa pito ka buwan niini nga pakigkumbate sa sakit nga leukemia sa edad nga 44. Ang kamatayon ni Francis una nga gipahibawo ni Vic Sotto atol sa show niini nga Eat Bulaga. Si Francis usa sa mga nahimong hosts sa maong longest-running noontime show.

Cory’s Death

Nahugno ang tibuok Pilipinas sa dihang nasayran sa kadaghanan ang pagtaliwan ni kanhi Presidente Corazon “Cory” Aquino niadtong Agusto 1 sa Makati Medical Center gumikan sa iyang gihambin nga colon cancer.

Si Cory ang nahimo nga simbolo sa mga Pilipino sa kagawasan ug paglaom sa dihang nakasinati kita og Martial Law ubos sa diktador nga si Ferdinand Marcos niadtong 70’s ug 80’s.

Johnny Delgado’s Death

Mipanaw ang beterano’ng actor nga si Johnny Delgado niadtong November 19, human ang iyang taas nga pakigkumbate sa sakit nga lymphoma, cancer sa immune system. Si Delgado natawo niadtong  February 29, 1948 nga ang tinuod nga pangalan mao si Juan Marasigan Feleo.

Si Delgado usa sa mga inila nga multi-awarded film actors nga aduna nay dul-an 60 ka mga pelikula. Ang iyang labing uwahi nga TV appearance nahitabo sa ABS-CBN primetime series May Bukas Pa.

Michael Jackson’s Death

Hunyo 25, nagkadaiyang teyorya ug pagtuo ang migawas kabahin sa tinuod nga hinungdan sa kamatayon sa giilang King of Pop nga si Michael Jackson. Sunod-sunod nga mga imbestigasyon ang gipahigayon sa Los Angeles County Coroner’s office human sa maong kamatayon.

Ang maong mga pagduda nahatagan og tubag sa dihang pormal nga gipamahayag sa nahisgutan nga buhatan nga ang kamatayon sa King of Pop naggumikan sa drug propofol nga gipahigayon sa personal physician niini. Ang drug propofol ang magpa-ubos sa tension ug kabalaka nga gibati sa tawo.

Sa laing bahin, sa susamang petsa usab mipanaw ang Hollywood actress nga si Farah Fawcett. Si Farah ang kanhi Charlie’s Angels star nga namatay gumikan sa sakit nga anal cancer sa edad nga 62.

Brittany Murphy’s Death

Ang kalit nga kamatayon sa Hollywood actress nga si Britanny Murphy migupok sa mga kasing-kasing sa iyang kaubanan sa industriya lakip na sa iyang pamilya niadtong December 20. Giingong “natural causes” ang hinungdan sa kamatayon niini.

Break-Ups: Jomari-Pops

Dili cool off kung dili “buwag” na gyud  sila si Jomari Yllana ug Pops Fernandez nga pormal nga miangkon niadtong Marso 2.

Matud pa ni Jomari nga “irreconcilable differences” ang hinungdan sa ilang panagbuwag ug giklaro niini nga walay third party nalambigit.

Jolina-Bebong

Pormal nga giangkon sa amahan ni Jolina Magdangal nga si Mr. Jun ang panagbuwag sa iyang anak ug ni Atty. Bebong Muñoz niadtong January 03. Daghan ang nangangha niini sanglit sweet man ang duruha sa mga TV guestings niini kaniadto. 

Pagkakaron, malipayon na si Jolens uban ang iyang bag-o nga boyfriend nga si Mark Escueta ug nagkanayon pa nga, “Sana siya na nga!”

Angel Locsin- Luis Manzano

Pormal nga gitino ni Angel Locsin ang ilang panagbuwag ni Luiz Manzano niadtong Oktobre 25 sa The Buzz human sa iyang taud-taud nga pagbalibad sa pagtubag sa maong isyu.

Sa dihang gipangutana  ang dalaga sa hinungdan sa ilang panagbuwag, wala na kini mihatag og dugang pa nga detalye kabahin niini. Matud pa sa dalaga nga dili nalang siya muhatag og comment ug respetuhon nalang ang privacy sa matag usa.

Full Blast Stories: Manny -Jinkee-Krista Triangle

Kung unsa ang kasadya human sa mainiton nga pagdawat sa katawhan kang Manny Pacquiao gumikan sa kadaugan niini batok kang Miguel Cotto, mao usab ang kagilok sa mga dila sa mga mahiligon og hungihong  nga gisagubang niini human kini malambigit kang Krista Ranillo.

Ug human ang taud-taud nga pagpakahilom ni Jinkee, mipagawas na gyud kini sa iyang tinuod nga gibati niadtong Nobyembre 22 sa Showbiz Central. Matud pa sa kapikas ni Manny nga maayo na ang ilang relasyon ni Manny ug nagkanayon nga “Okey naman, basta nag-uusap kami. Lumilipas naman ang problema sa pag-uusap, e, di ba.” Wala man direkta nga miangkon, pero nagpamatuod lamang kadto nga diha gayuy bagyo nga mikuso-kuso sa ilang pamilya

Ruffa Gutierrez-John Lloyd Cruz

Usa ka paparazzo photo nila ni Ruffa Gutierrez ug  John Lloyd Cruz ang nikatap sa internet human nakit-an ang duha nga misulod sa usa ka swanky hotel sa Beverly Hills, California niadtong Hunyo.

Nakit-an ang duruha samtang naglakaw kini sa high-end boutiques sa Rodeo Drives, Beverly Hills nga parehong nagsa-ulog sa ilang adlaw’ng natawhan.

Bisan pa man sa padayon nga pang-himakak sa duruha sa ilang tinuod nga relasyon, ang maong mga hulagway miduso og pagduda ug konklusyon sa katawhan nga ang duruha aduna na gyu’y relasyon.

Juday-Ryan Happy Ending

Niadto’ng Abril 28 nasaksihan sa mga suod nga higala ug pamilya nila ni Judy Ann Santos ug Ryan Agoncillo ang ilang panaghi-usa sa altar sa kaminyuon nga gisa-ulog sa San Juan Church sa Batangas diin usab gikasal ang mga ginikanan ni Ryan. Sikreto, makahuluganon ug mabulukon ang maong kasal.

Claudine Barretto Milayat

Nahangangha ang kadaghanan sa dihang pormal na nga mipirma ang kanhi Kapamilya actress nga si Claudine Barreto og two-year contract sa GMA Network Center niadtong Nobyembre 25.

Matud pa ni Claudine nga paspas ang nahimo’ng pinirmahay niya og kontrata sa GMA-7 uban ang iyang mga ginikanan ug top executives sa maong network.

Tolentino Na-Trauma kang Chin Chin

Nahugyaw ang kadaghanan sa nahimong pamahayag ni Lorna Tolentino kabahin sa pisikal nga pagdapat ni Chin-chin Gutierrez sa ilang taping sa usa ka eksena sa drama series nga Dahil May Isang Ikaw niadtong Oktobre 30. Hinuon, gihusay gilayon sila sa management ug padayon silang nagkauban sa malampuson kaayo karong   teleserye sa ABS-CBN. 

Ang uyab ni Senator Noy

Human ang vocal kaayo nga pamahayag ni Kris Aquino atol sa Requim Mass sa ilang inahan nga si Pres. Cory Aquino nga dili paminyuon ang iyang maguwang nga si Noynoy Aquino, sunod nga milugwa ang mga hulagway niini uban ang iyang girlfriend nga si Valenzuela City Councilor Shalani Soledad.

Mahinumduman nga mitambong ang konsehala atol sa lubong sa inahan ni Noynoy ug gituyo lamang niini nga magsul-ob og itom aron dili kini makakuha og atensyon ilabi na kang Kris.

Richard Gutierrez Naaksidente

Mayo 22, mahinumduman nga naaksidente si Richard Gutierrez, kadlawon, sa Santa Rosa-Tagaytay Road, Puting Kahoy Village, sa Silang, Cavite.

Namatay sa maong insidente ang production assistant niini nga si Nomar Prado. Tungod sa maong panghitabo, mikiha ang pamilya ni Prado og reckless imprudence resulting to homicide batok sa actor. Kasamtangan pa nga nag-ung-ong ang maong kaso sa municipal trial court kong diin gisang-at ang maong aksyon.

Sen. Mar Roxas and Korina Sanchez, Finally!

Nagsadya ang mga higala ug pamilya nila ni Sen. Mar Roxas, 52, ug TV journalist Korina Sanchez, 45 niadtong Oktobre 25 atol sa ilang pagbinayloay og  mga panaad sa Sto. Domingo Church sa Quezon City. Ang maong kaminyuon giisip nga “Wedding of the Year” nga gitambungan sa nagkadaiyang political leaders, showbiz personalities ug business tycoons.

Hayden-Vicky-Katrina, Plus Others

Human ang kontrobersyal nga pagkalambigit ni Katrina Halili sa Hayden-Vicky break-up sa miaging tuig, mibalik pagbuto ang isyu sa dihang nalakip kini sa mga mikatap nga sex videos sa kanhi doctor kauban ang nagkadaiyang mga babaye. Miresulta sa Senate inquiry ang eskandalo ug ang labing bag-ong kalambuan mao ang pagkatangtang na sa lisensya ni Hayden isip doctor nga matud pa maoy rason sa pagsuway niini og kutlo sa iyang kinabuhi niadtong Nobyembre.