Rufa Mae napikon?

CEBU, Philippines - Migawas karon ang hungihong nga nairita matud pa si Rufa Mae Quinto kay napunta na ang tanang publicity kang Krista Ranillo. Si Rufa Mae ang leading lady ni Manny Pacquiao sa Wapakman samtang kontrabida ang role ni Krista sa nahisgutang pelikula.

Villar infomercial idea ni Michael V

Si Michael V gyud mismo ang mihatag og concept sa infomercial nila ni Sen. Manny Villar nga migawas na karon sa telebisyon. Tsika pa niya nga duna’y kagawasan ang mga tawo sa pagpili sa gusto nila nga kandidato busa dili angay magubot panahon sa eleksiyon.

Imelda-Melissa concert nakanselar na pud

Sa ikaduhang higayon, nakanselar na usab ang concert ni Imelda Papin dinhi sa Pilipinas uban sa international singer nga si Melissa Manchester .Giingong wa modayon si Melissa gumikan sa nahitabong kagubot dinhi sa nasud sama sa masaker sa Maguindano.

Sharon magazine

Sa January 2010 na mogawas ang unang magazine nga Sharon! ubos sa ABS-CBN Publishing . Unod sa maong magazine ang mga kalihukan ni Megastar Sharon Cuneta sa showbiz industry.

Isip-isip

Huna-hunaon pa ni Jinkee Pacquiao kung motambong ba siya sa premier night   sa pelikulang   Wapakman nga gibidahan sa iyang bana nga si Manny uban sa babaye nga na-link niini nga si Krista Ranillo.

Bayani mag-radio anchor

Sudlan na pud ni Bayani Agbayani ang Radio industry gumikan kay siya ang gikatakdang mohulip sa radio program ni Arnel Ignacio sa DZBB. Gawas sa maong proyekto, makita na usab si Bayani sa morning show nga Unang Hirit.

Cyst ang hinungdan

 Operahanan diay si Mark Anthony Fernandez ug mao kini saktong rason nga mihawa siya sa Darna. Dunay cyst sa dughan ang aktor ug kinahanglan niya ang igong pahuway.

Tuig ni Heart

Matud pa nga gisuwerte gyud si Heart Evangelista karong tuiga kay gawas sa iyang TV projects , nalakip usab siya sa duha ka pelikula nga sa Metro Manila Film Festival nga Mano Po 6 ug Nobody Nobody But Juan .

Hugyaw nga Mica

Usa sa giatngan sa Ang Darling Kong Aswang mao ang hugyaw nga acting sa Star Magic talent nga si Mica dela Cruz . Malipayon si Mica nga natagaan siya og tsansa nga iyang maipakita ang iyang abilidad sa usa ka horror movie.

Intriga makatabang sa Wapakman

Matud pa Manny Pacquiao nga nagkinataw-anay lang sila ni Krista Ranillo sa dihang nagkita sila niini sa last shooting day sa Wapakman. Dugang pa niini nga wa sila kiwawi sa usag-usa bisan pa man nga init kaayo ang isyu nga nag-link kanilang duha.Gani milenggua matud pa si Krista nga daghan ang manan-aw sa ilang pelikula gumikan sa isyu nga ilang giatubang.

Bisita ni Pacman nangahadlok

Giingong mahadlok motambong ang mga bisita ni Manny Pacquiao sa iyang birthday party karong December 17 didto sa General Santos . Resulta kini sa padayong kagubot sa Maguindanao.

P3M nga studio  ni Gab

Busy karon si Gab Valenciano sa pagpatukod sa iyang kaugalingon nga studio nga migasto na og kapin sa P3 Million gumikan kay imported kasagaran ang gigamit nga mga materyales niini.

Kris wa sa poster

Dili angay ikahibulong nga wala ang pangalan ni Kris Aquino sa poster sa Mano Po 6 kay mao kini ang gusto sa TV host.

Shawe “best in late”

Udto ang gikatakdang oras sa presscon ni Sharon Cuneta niadtong Biyernes  alang sa Mano Po 6 pero pasado alas tres sa hapon na kini miabot.

Diaper ni Dolphy aprobado na sa MTRCB

Nasulbad na ang problema tali sa MTRCB ug sa usa ka eksena sa pelikulang Nobody Nobody But...Juan diin naka-diaper lang si Dolphy.  Matud pa nga dili law-ay ang maong eksena kay seguradong ma-hugyaw og maayo ang moviegoers niini.

Diva giintriga na!

 Gipadayag sa garbo sa Cebu sa StarStruck V nga si Diva Montelaba nga dili tinuod ang migawas nga tsismis nga matud pa wa siya managad ni Jaya sa dihang mi-guest siya sa programang Bandaoke sa GMA-7.

Tsika pa ni Diva dinhi sa Banat Hugyaw nga usa lang ka intriga ang maong taho.

“Na-starstruck man gani ko ni Mam Jaya,” nagkanayon si Diva dinhi sa Banat Hugyaw.

Samtang malipayon si Diva kay gihangop gyud siya sa mga tawo sa nagkadaiyang mall shows sa Starstruck V didto sa kaulohan.

Tataw ang kaguwapa karon ni Diva tungod sa iyang new hairstyle nga susama sa sikat nga singer nga si Rihanna. (Sanden J. Anadia)