Dessa wala nang ingay
Mabuti na lang nagpalabas ng statement ang Kapuso network tungkol sa pagkawala ni Mark Anthony Fernandez sa Darna. Nag-aalala na ang mga fans niya lalo na nang mabasa nilang may sakit ito.
Sari-saring ispekulasyon ang lumalabas at isa sa talagang nakasisira sa actor ay ang diumano’y pagbabalik niya sa masamang bisyo.
Hindi naman pala, may gagawin lang iba. Pero bakit hindi na lang ito ginawan ng paraan sa Darna? Bakit hindi na lang binigyan ng closure sa istorya ang character niya? Inakala tuloy ng marami na he was not performing well kaya pinalitan siya ni Dennis Trillo.
Sa pagkawala ni Alfred Vargas dahil sa 2010 elections, nabawasan na naman ang maikling listahan ng mga leading men ng GMA 7. Sayang naman kung pati si Mark, matatanggal din sa talaan, di ba?
* * *
Parang walang masyadong funfare ang pagdating ni Dessa sa bansa gayung isa siya sa maituturing na pinaka-magaling nating singer na nagpasyang manirahan sa US.
Magbabakasyon dito ang singer hanggang Pebrero. Pero dahil sa napaka-limited na time niya rito kung kaya’t kabi-kabila ang offer sa kanya na mag-show. Isa sa nagkapalad na mabigyan ng booking ay si Jobert Sucaldito. Ibinack-to-back nito ang balikbayan singer kay Jimmy Bondoc sa isa sa pinaka-matagumpay na konsiyerto na ginanap kahapon sa Metro Bar Sa West Avenue.
Sana mag-guest siya sa Walang Tulugan. Sino ba nagha-handle sa kanya ngayon?
* * *
Pinangangatawanan na ni Eva Eugenio ang pagka-come back sa kanyang pagkanta. Tama lang, dahil matagal nang nakabalik at nakagawa ng recording ang mga kasabayan niyang sina Claire dela Fuente at Imelda Papin. May album siyang ginawa kaya magiging visible siya hindi lamang sa telebisyon kundi maging sa radio at mga shows. Yung boses niya na naririnig n’yong madalas ngayon na kumakanta ng mga awitin ng ibang singers ay bagong recording niya.
* * *
Sayang at cancelled na naman yung concert ni Imelda Papin kasama ang international singer na si Melissa Manchester. Ito sana yung dalawang gabing konsiyerto niya na magaganap sa PICC at Waterfront Hotel sa Cebu. Ang international singer ang nag-back out dahil sa nangyaring massacre at sunud-sunod na pangingidnap ngayon sa bansa. Natakot ito kaya ayaw nang tumuloy. Kapag malamig na raw ang panahon, saka siya pupunta rito. Ganun?
- Latest
