Obra ni Remton

CEBU, Philippines -  Ang iyang mga indie films nakadawat og nagkadaiyang pasidungog ug nahilakip sab sa mga film festivals sulod ug gawas sa nasod. Sa tuig 2005, iyang nalangkat ang ikatulong ganti sa labing unang Sinulog documentary competition pinaagi sa iyang obra nga “Ang Gabayan” nga na-exhibit sab sa MOV International Film Festival. Ning nakalabay’ng tuig, nasigpaw na gyod niya ang grand prize sa Sinulog Documentary Competition alang sa “Sinug” nga nakadawat sab sa Best Editing ug Best Production Design nga mga pasidungog.

 Ning tuiga, ang lilas “Humamai” milandig isip Second Best Picture sa labing unang Sinulog Short Film Festival diin nahilakip sab kini sa “Sinugbuanong Lilas” screening sa CAFA Theatre. Tungod sa kamahinungdanon ug gibug-aton sa karakter ug sugilanon ni Humamai, kapikas ni Rajah Humabon, nalangkat niini ang Best Production Design, Best Story ug Best Actress awards. Kasamtangan nga mibyahe ang Humamai alang sa usa ka pakigsangka sa India o sa Culture Unplugged Film Festival. Mao sab ang “To Siomai Love” adunay premiere sa Visual Arts Theatre sa New York, USA alang sa Indio Bravo Film Festival. Ang “To Siomai Love” nakadaog ning bag-ohay lang isip Best Short Film sa Cinemanila International Film Festival.

 Samtang ang “Uwan Init Pista sa Langit”, diin kauban niya si Keith Deligero isip katimbang nga direktor, usa sab sa mga finalists sa Southeast Asian Short Film Award alang gihapon sa Cinemanila International Film Festival. Tungod ning mga bunga sa iyang tingusbawan sa natad sa pagpanggaling og lilas, gipasidunggan si Remton sa Ishmael Bernal Award isip Most Outstanding Young Filipino Filmmaker.

 Ug kay ginaingon man nga kun mouwan, mobuhagay gyod (susama’g flash flood), ang labing uwahing stop motion animation film niya nga nag-ulohag “Mga Damgo” wa papiri. Gihukman sab kini isip mananaog sa Animation Category alang sa Cine Indie for Millennium Development Goals Film Festival nga nagtuboy sa tingusbawan sa United Nations nga maoy tigpasiugda. (Maria Eleanor E. Valeros