Jennylyn nawiwiling mag-pose sa men's mag

Akalain mo, parang pinagbigyan tayo ng pana­hon para magkaroon tayo ng masayang pag-alaala sa ating mga namatay na mahal sa buhay.

Biglang sumikat ang araw nung mismong unang araw ng Nobyembre na kahit Araw ng mga Santo na nakagawian na nating gunitain ang ating mga patay sa halip na sa Nobyembre 2 na All Souls Day, araw ng mga kaluluwa.

At marahil kung hindi lamang natakot sa bag­yong Santi ang mas nakakarami, baka mas na­ging siksikan pa ang mga sementeryo natin.

Pero umulan man o umaraw, nagsiksikan pa rin sa sementeryo ang maraming tao. Isa itong araw na bukod sa ginugunita natin ang mga nama­tay nating mahal sa buhay ay nagsisilbi rin itong da­hilan para magkita-kita o magkaroon ng reunion ang mga pamilyang magka­kahiwalay na.

 All Saint’s Day and All Soul’s Day ay mga araw when we have fun. Tapos na ang pagiging ma­lung­kot. Natanggap na natin ang pag-iwan sa atin ng ating mga mahal sa buhay.

Balik na naman tayo sa ating normal na pamu­muhay. May nagba­banta na namang bagyo kaya paghandaan natin ang pagdating nito. Pero ka­sabay ng paghahanda, huwag nating kalilimutan na kahit maganda ang panahon sa Kamaynilaan, ma­ra­ming sinalanta ang bagyong Santi.

* * *

Sa dinami-rami ng anak ni Francis Magalona, alam ko na meron at meron siyang anak na susu­nod sa kanyang yapak bilang isang rapper.

Meron nang dalawang anak (Saab at Maxene) na babae na nag-aartista si Francis. Meron na rin siyang product en­dorser at isang fashion model.

Huling nagpakita ng kanyang talento sa pagkanta ay ang isa pa niyang anak na si Elmo, na nakasamang mag-perform ni Ely Buendia ng kanta na pinag­tu­lungan nilang mabuo ng namatay na rapper sa NU Rock Awards na kung saan binigyan ng tribu­te ang Master Rapper.

Okay si Elmo, medyo mahiyain pa pero kapag nasanay na sa stage ay maaring sumikat na tulad ng kanyang ama. Kahit naka-metal ang mga ngi­pin, carbon copy siya ng kanyang ama.

* * *

Mukha namang nawiwiling mag-pose sa cover ng men’s magazines si Jennylyn Mercado. Bakit naman hindi? Hindi naman lahat ng moms ay nabi­bigyan ng chance na tulad ng nakukuha niya. Ika nga, strike while the iron is hot.

Kapag tumanda na siya at nasira ang katawan ay hindi na niya ito magagawa. Bakit hindi habang bata siya? Paglaki ng anak niya ay puwede niyang ipagmalaki dito na naging sexy din ang kanyang mom.

* * *

Mukhang makaka-hit na naman ang Star Cinema sa Ang Tanging Pamilya, ang movie na nagpi-feature sa pagbabalik pelikula ng dating pa­ngulong Joseph Estrada. Kasama bilang asawa niya sa movie si AiAi delas Alas at anak nila si Toni Gonzaga na nakatakdang magpakasal kay Sam Milby na anak naman ni Dionisia Pac­quiao.

Sa trailer pa lamang ay marami na ang nata­tawa lalo na sa mga eksenang magkasama sina AiAi at Aling Dionisia. Idagdag mo pa ang natural na flair ni Erap sa comedy. Well, si AiAi hindi na ipagtatanong pagdating sa comedy. Talagang forte niya ito.