Bea nanghinayang sa van ni Sam

MANILA, Philippines - Nag-alala pala si Bea Alonzo nang malaman nitong naaksidente ang co-star nitong si Sam Milby ka­makailan.

Nabalita na grabe ang natamong pinsala ng   van ng aktor. Sa kabutihang palad, hindi naman nasaktan si Sam. Nang marinig ni Bea (katambal ni Sam sa Your Song Presents Someone to Love) ang masa­mang balita, agad nitong kinontak ang hunk actor upang direktang malaman kung ano na ang lagay nito.

“I was shocked nung narinig ko, so I immediately texted him to make sure na walang nangyari sa kan­yang masama. When he replied na okay naman siya at wala namang nasaktan sa aksidente, I was relieved but I still thought of his car… bago lang kasi yun eh. Binili niya yun when we were doing And I Love You So. Sayang, dahil pinaghirapan niya yun,” kuwento ni Bea.

Sa kabilang dako, nagpapasalamat na rin si Sam dahil nalagpasan niya ang di inaasahang panganib.

Samantala, sa susunod na episodes ng Your Song, mag-uumpisa nang magpanggap sina Melissa (Bea) at Morrie (Sam) para sa pakinabang ng bawat isa. Magkukunwaring boyfriend ni Melissa si Morrie sa harap ng kanyang nag-aagaw-buhay na ama ha­bang nagpapanggap naman na sekretarya si Melissa sa tuwing kaharap ang girlfriend ni Morrie. Ngunit hindi magtatagal ay nanaisin na rin ni Melissa na ipahayag ang katotohanan.

Ano ang gagawin ni Morrie? Kakayanin kaya niyang sabihin ang totoo sa kanyang girlfriend?

‘Wag palalampasin ang Your Song Presents Some­one to Love, tuwing Linggo sa ABS-CBN.