People are talking about Justine

CEBU, Philippines - Bisan asang suok kagahapon, sumsuman ang kalampusan sa transgendered nga si Justine Ferrer sa nagpadayong Survivor Philippines: Palau, sa GMA-7.

Sa Internet—sa mga nagkadaiyang blogs ug forums—sa mga opisina ug sa kilid-kilid, ang hingpit na nga paghibalik ni Justine sa gi-merge na nga Sonsorol maoy gikagubtan sa tanang mga fans sa maong reality show franchise.

Gani daghan na man ang mitag-an nga hayan ang 30 anyos na nga si Justine maoy mamahimong Sole Survivor tungod sa katakos nga iyang gipakita human niya pildiha ang unom ka castoffs didto sa Isla Purgatoryo sa Palau.

Pero duna poy mga nabalaka para kang Justine tungod kay human masaksihi sa iyang mga ka-tribo migawas nga siya na ang labing dako ug labing lig-on nga hagit alang ni bisan kinsa nga nanganti paglangkat sa titulo. Tungod niini, dunay nagtuo nga magtinabangay ang ubang castaways aron hingpit gyud nga mahinginlan si Justine gikan sa Palau ug papaulion sa Pilipinas aron paghangop sa iyang kaparotan.