Kampo ni Kristine Hermosa pumiyok
Sa pagdating ng 2010 election, maraming artista pala ang susubok sa pulitika. Hinahangad ko lamang na sana, kapag nanalo sila ay maibigay nila ang dedikasyon na hinihingi ng kanilang posisyon.
Bagaman at agree ako na hindi nila maiiwan ng lubusan ang kanilang pag-aartista dahil dito sila kukuha ng pang-suporta sa kanilang magiging trabaho sa gobyerno na alam nating lahat na hindi makakasapat, buo sana ang kanilang maging trabaho at maibalik ang pagtitiwala ng mamamayan sa pamamagitan ng serbisyo.
***
Sabay natapos nung Biyernes ang Kung Aagawin Mo Ang lahat Sa Akin at Ngayon at Kailanman. Sa Lunes panibagong serye na naman ang mapapanood at sigurado ako na mas magaganda ang papalit sa mga nagtapos pero bakit pinagaganda ng husto ang mga serye pero hindi ang ending?
Ang suwerte ni JC Tiuseco dahil namatay si Patrick Garcia sa Kung Aagawin..., silang dalawa ni Maxene Magalona ang naging bida. Paghahanda na ba ito sa marami pang pagbibida na gagawin ang nanalong Sole Survivor 1?
Maganda ang mga pelikulang Kaya Kong Abutin Ang Langit na tumatak nun kay Maricel Soriano at ngayon ay pipiliting pantayan ni Iza Calzado.
Kailangan, lalo’t ka-back-to-back niya ang serye naman na magtatampok kay Sunshine Dizon na sinasabing kasamaan niya ng loob ngayon. Hindi niya gugustuhing matabunan ni Sunshine na role naman na ginampanan ni Nora Aunor sa pelikula.
***
May reaksiyon yung sinulat kong dalawang pasaway sa ABS-CBN. May nagtanggol kay Kristine Hermosa at nagsabing hindi niya malaman kung sino ang nagkakalat ng mga maling balita dahil ang alam niya, walang problemang ibinibigay ang magandang aktres sa network at sa mga taong bumubuo ng seryeng Dahil May Isang Ikaw na kung saan ay nagbibigay ng magandang performance si Kristine.
“Yung pagbabakasyon niya ng isang linggo ay matagal nang pinagkasunduan dahil nga birthday niya. Wala namang naapektuhan dahil na-adjust ang sked niya.
“Unfair na pagbintangan ng katarayan si Kristine. Hindi ko sinasabing hindi siya mataray pero sa Dahil May Isang Ikaw, wala akong nakitang ganitong pag-uugali sa kanya,” sabi ng kausap ko.
Kay Cristine Reyes ba walang magtatanggol?
- Latest
