Kesa sa boxing Pacquiao inuuna pa ang pagpa-praktis ng kanta

Kakaiba ang experience ko kahapon sa presscon ng Mang Inasal para kay Mark Bautista. Kakaiba dahil sa rami ng mga tao, parang naligaw ako sa venue na pinuntahan ko.

Hindi lang ang entertainment press ang invited sa presscon ni Mac-Mac. Imbitado rin ang mga advertising people ng mga diyaryo kaya napuno ang function room ng Mang Inasal sa Tomas Morato.

Hindi kaagad nakapag-umpisa ang presscon dahil sa tsikahan portion ng mga bisita habang kumakain sila ng masarap na pagkain sa Mang Inasal na parang kabute na lumitaw sa Metro Manila at probinsiya ang kanilang mga branch.

Bilib ako sa may-ari ng Mang Inasal na si Mr. Edgar Sia dahil napaka-agrressive niya kaya mabilis na nakilala ng mga consumer ang kanyang negosyo.

Ilang beses na rin akong nakakain sa Mang Inasal sa Morato, kahit tanungin ninyo ang kanilang mga empleyado na nakapag-serve sa akin.

* * *

Malaking opportunity ang dumating kay Mark dahil siya ang napili na endorser ng Mang Inasal.

Naglalakihan ang mga billboard at restaurant ng Mang Inasal. Nakakasiguro si Mark na araw-araw siyang makikita ng mga motorista at pedestrian dahil sa kanyang mga giant billboard.

Twenty-eight years old na pala si Mac-Mac pero wala pa siyang girlfriend. Kung bakit, hindi ko alam dahil hindi na ako nag-usisa. Baka hindi type ni Mac-Mac na pinag-uusapan ang kanyang personal life ‘noh!

* * *

Narinig ko kahapon sa radyo ang balita na handa si DILG Secretary Ronnie V. Puno na isakripisyo ang kanyang balak na pagkandidato kung si Governor Vilma Santos ang pipiliin ng administrasyon para kumandidatong Vice-President sa 2010 elections.

Hindi pa kami nagkakausap ni Papa Ronnie pero aalamin ko ang katotohanan tungkol sa balita na nasagap ko kahapon.

Sasabihin ko agad sa inyo ang mga mapag-uusapan namin ni Papa Ronnie na hindi itinatago ang paghanga kay Vilma dahil sa magandang record nito bilang dating mayor ng Lipa City at Governor ng Batangas province.

Ganyan ka-gentleman si Papa Ronnie. Handa siyang magparaya kung ‘yon ang kagustuhan ng nakararami. Hindi siya katulad ng iba diyan na sugapa sa kapangyarihan. Sugapa raw o!

* * *

Tuloy ang show ni Manny Pacquiao sa Las Vegas at makakasama niya ang kanyang Show Me Da Manny co-stars na sina Paolo Contis at Benjie Paras.

Nag-practice na nga si Manny ng mga kakantahin niya sa kanyang concert. Nauna pa ang kanyang practice sa pagkanta kesa boxing training niya sa Baguio City.

Pinag-iisipan ko pa kung panonoorin ko ang laban ni Manny kay Manuel Cotto. Marami ang nag-iimbita sa akin na manood pero depende ito sa aking hectic schedule. Hindi ako pumupunta sa ibang bansa kapag malapit na ang Pasko dahil priority ko ang pag-aabang sa mga early Christmas gift na ipinadadala sa akin. Mas malaki at marami ang mawawala sa akin kapag nagpunta ako sa ibang bansa tuwing Christmas season.