Sarah Nanalipod sa TESDA

CEBU, Philippines - Gipanalipdan ni Sarah Geronimo ang Technical Educational Skills Development Authority (TESDA) pinaagi sa pagpasabot nga gidawat niya ang maong endorsement sanglit kumbinsido siya sa tumong niini nga mahatagan og technical-vocational training kadtong bag-ong graduate ug ang mga nangita og trabaho.

Buot usab niya pa nga makatabang aron mahanaw na ang pagtan-aw sa publiko nga second class career option lang ang technical-vocational courses. Sa balita sa www.stir.ph, gipadayag ni Sarah nga dako kaayo niyang garbo nga makatabang sa TESDA alang sa public awareness campaign niini. Nasayran nga gisaway karon ang TESDA tungod sa paggasto og P4.9 Million alang sa maong sing and dance infomercial.