Comeback ni Cogie kontrobersiyal

Parang hindi naman maganda ang pagbabalik ni Cogie Domingo na may kakabit na isyu. Napaka-tagal siyang hinintay ng kanyang mga fans na ang katuwaan sa kanyang pagbabalik ay napalitan ng agam-agam dahil nasasangkot ang pangalan niya sa isyu ng bugbugan ng dating karelasyon ni dating governor Chavit Singson na si Che Tiongson.

Sana malusutan ni Cogie ang problemang ito dahil sayang kung hindi niya maipagpapatuloy ang kanyang career. Napaka-galing niyang artista, sayang kung hindi niya ito mababalikan. Sayang ang oportunidad.

* * *

Kung hindi pa ako nakapagbukas ng maaga ng TV kahapon, hindi ko pa malalaman na patuloy pa rin pala ang pagbibigay ng serbisyo ng Kapwa Ko Mahal Ko. Matagal nang naglilingkod sa publiko ang programang ito at hindi na mabilang ang nakinabang sa libreng gamutan at gamot dito.

It is heartening to know na si Connie Angeles pa rin ang host nito. Matagal nang may mga nagtatanong sa akin tungkol sa kanya, ever since na napalitan siya bilang vice mayor ng Quezon City pero hindi ko sila masagot. Ngayon, alam ko na nasa Kapwa Ko Mahal Ko pa rin siya at SM Foundation.

* * *

Tingnan mo nga naman at maraming natutunan sa buhay si Binoe (Robin Padilla) para maging isang mabuting ama.

 Nagpaalam daw sa kanya ang anak niyang si Queenie para tumanggap ng manliligaw sa kanilang tahanan at agad naman siyang pumayag.

Kung sabagay, paano mo tatanggihan ang isang mabuting pakiusap na nagbabadya ng magandang pagpapalaki niya sa anak? Ang dami-dami ngang kabataan diyan na hindi na dumadaan sa ligawan at kung saan-saan mo nakikitang nakakalat pero heto ang anak niya at nagpapaalam para madalaw ng pormal sa bahay. Bakit hindi naman niya ito papayagan?

Speaking of Robin, tuloy na pala ang paggawa niya ng pelikula sa Star Cinema. Natuloy din pala ang negosasyon nila.

Ganito lang naman sa showbiz, kung saan may trabaho, dun ka.

Sana nga, wala na ‘yang mga bawal-bawal para makalabas sa lahat ng network ang mga artista at hindi malimitahan ang kanilang talento sa kung saan sila nakakontrata.