Alyssa na-hypnotize
Gusto kong maawa pero mas nananaig sa akin na sermunan si Alyssa Alano kapag nagkita kami bukas sa Startalk dahil nabiktima siya ng Dugo-Dugo Gang.
Mas maiintindihan ko yata kung ang kasambahay o ang personal assistant ni Alyssa ang naloko ng mhin na nagpakilalang si Ricky Lo dahil hindi naman nila kabisado ang boses ni Papa Ricky o ang cellphone number nito.
Pero mismong si Alyssa ang nabiktima at nakipagkita sa impostor na humarbat sa mga gift certficate na nagkakahalaga ng P50,000 with matching perfume! Nakakaloka di ba?
Mabait sa dilang mabait si Alyssa. Mapagtiwala siya sa kapwa pero para maloko siya dahil lang sa isang tawag sa telepono, hindi na kabaitan ang tawag doon. Ano ba ‘yung tawagan niya ako o ang staff ng Startalk para ma-confirm niya kung talagang nangangailangan ng mga gift certficate si Papa Ricky.
Sinasabi ni Alyssa na na-hypnotize siya ng lalake habang magkausap sila sa cellphone. Sa telepono pa lang ‘yon ‘ha? Paano pa kung nagkaharap sila nang matagal?
Pasalamat na lang si Alyssa dahil walang ibang masamang nangyari sa kanya pero hindi ito mangyayari kung pinairal niya ang pagiging malisyosa o nagduda siya kahit konti.
Magpasalamat din siya dahil na-convert sa GC ang P50,000. Puwedeng hindi magamit ng manloloko ang mga GC kapag na-report ito sa management ng SM. Paano na lang kung datung ang ibinigay ni Alyssa sa kriminal? Eh di parang naglaho sa hangin ang pera na kanyang pinaghirapan!
Aral sa ating lahat ang nangyari kay Alyssa. Kung makakatanggap kayo ng tawag sa telepono mula sa tao na nangungutang at kahina-hinala ang mga sinasabi, huwag magdalawang-isip na mag-imbestiga o magsumbong sa pulisya!
* * *
Natawa ako sa sinabi ni Papa Chavit Singson sa interbyu sa kanya ng dzRH. Inamin ni Papa Chavit ang pang-uumbag sa mhin na nakita niya na kasama ng kanyang dating partner na si Che.
May mga ebidensiya na pinanghahawakan si Papa Chavit na magpapatunay na nagtaksil si Che.
Nakunan yata ng litrato ang lalaki na nakahubad. Ang sey ni Papa Chavit, maliit ang notaryo publiko ng mhin na hindi niya pinangalanan.
Nagtatanungan ngayon ang mga interesado sa kaso. Gusto nilang malaman ang name ng mhin. Dahil wala pang nakakaalam sa name ng mystery guy, itago muna natin siya sa pangalan na Tweety Bird.
* * *
Congrats kay Eugene Domingo dahil nabalitaan ko na hit ang kanyang launching movie. Talagang pinipilahan daw ang pelikula kaya may debate ngayon, si Eugene na ba raw ang bagong Comedy Queen?
Hindi ang sagot ko dahil si AiAi delas Alas pa rin ang current Comedy Queen. Puwede na siguro kay Eugene ang title na Comedy Princess dahil kahit saang anggulo tayo tumingin, hawak ni AiAi ang korona ng Comedy Queen. Matatagalan bago mapantayan ng ibang komedyana ang achievements ni AiAi.
- Latest
