Kahit hinarang sa airport, Dra. Belo nakalipad na pa-Amerika

Natuloy kahapon ang pagpunta ni Dra. Victoria Belo sa Amerika, kesehodang may humarang sa kanyang biyahe noong Miyerkules.

Nakarating din sa akin ang balita na nakabantay raw sa international airport ang isang lawyer dahil inakala yata nito na makukunan ng mga TV camera ang pagkakabulilyaso ng US trip ni Mama Victoria.

Kung sinuman ang magaling na nagtawag sa media people, nabigo siya na malagay sa kahihiyan si Mama Victoria dahil hindi nagtagumpay ang kanyang balak na magkaroon ng TV exposure.

* * *

Wala pang nakakaalam sa tunay na dahilan ng break-up nina Angel Locsin at Luis Manzano dahil hindi pa sila nagsasalita.

Narinig ko ang balita tungkol sa kanilang paghihiwalay sa birthday lunch treat ng PAMI para kay Mother Lily Monteverde sa Via Mare Morato noong Huwebes dahil lumabas dito sa PSN.

Habang pinag-uusapan ang lovelife ng dalawa, sige ako sa pagpapabalot ng mga pagkain dahil sa aking akala na may maglilibre sa amin.

Ang ending, ang mga PAMI member pala ang magbabayad sa mga kinain namin as in kanya-kanya kami ng kontribusyon. Nagkataon na andun si Annabelle Rama sa Via Mare kaya siya ang pinagbayad ko sa mga take-home food ko.

* * *

Aligaga si Annabelle sa shooting ng Patient X, ang comeback horror movie ni Yam Laranas.

Nakikialam si Bisaya sa Patient X dahil mga alaga niya ang bida ng pelikula, ang kanyang anak na si Richard Gutierrez at si Heart Evangelista.

Co-producer si Richard ng GMA and Viva Films project. Hindi na bago kay Bisaya ang pagpo-produce ng pelikula dahil ang pamilya niya ang nag-produce noon ng remake ng Ang Pinakamagandang Hayop sa Balat ng Lupa.

Gagawin ni Annabelle ang lahat para maging successful sa box-office ang Patient X dahil maganda ang project.

* * *

Sobra ang init ng panahon kahapon. Hindi na ako nakapunta sa pa-presscon ng Mega Sardines para kay Cesar Montano dahil dumiretso na ako sa presscon ni Dr. Manny Calayan para sa aking alaga na si Alfred Vargas.

Hindi man ako nakasipot sa presscon ni Cesar, ipinadala naman sa akin ni Shirley Pizarro ang mga Mega sardines.

Puwedeng kumuha ng ibang endorser ang mga may-ari ng Mega pero si Cesar pa rin ang kanilang kinuha. Mabait na endorser at madali raw kausap si Cesar as in wala itong arte sa katawan.

Nag-shoot na si Cesar ng kanyang bagong TV commercial para sa Mega. Pilipinong-Pilipino ang concept ng TV commercial na malapit nang ipalabas.

Ipakikita ni Cesar sa kanyang TV ad na may puso ang Mega sardines. Tadtad nga ng puso ang mga dialogue niya sa TV commercial kesehodang Kapamilya talent siya.