Basil Valdez at Joey Albert 'di pewedeng ikumpara

MANILA, Philippines - Ang dalawang mang-aawit ng magkaibang dekada — sina Basil Valdez at Joey Albert — ay magpapamalas muli ng galing sa isang concert sa darating na Agosto 15 sa Skydome sa SM North EDSA.

Produced ng Viva Concerts & Events, tamang-tama ang titulo ng kanilang pagbabalik sa concert stage, ang Incomparable, dahil tunay na hindi maikukumpara ang talento ng dalawa sa mga local balladeers natin ngayon.

Si Basil ay sumikat noong ’70s sa mga kantang Nga­yon at Kailanman, Hanggang sa Dulo ng Walang Hanggan, Lift Up Your Hands, Kung Ako’y Iiwan Mo, Kahit Ika’y Panaginip Lang, at iba pa.

Si Joey naman na nakilala noong dekada 80 ay hindi malilimutan sa mga kantang Tell Me, Yakapin Mo Ako, Points of View, Iisa Pa Lamang, at I Remember the Boy.

Nagkaroon na ng ilang shows noong ’80s sina Basil at Joey at naging magkaibigan pa kahit lumipas na ang ilang taon. Kaya parehong naging masaya at excited ang dalawa nang malamang ipagpo-produce sila ng show ng Viva at sa modernong venue pa.

Ang mga tiket sa Incomparable ay mabibili sa lahat ng SM Ticketnet outlets (911-5555) at para sa mga katanungan ay tumawag sa Viva Concerts & Events (687-6181 locc. 627 or 620).