Katrina Halili whispers candidly

CEBU, Philippines – Gawas sa usa ka lalake nga miduol sa van nga iyang gisakyan ug mipukpok sa bintana dayong ingon “Hayden Ko, Hayden Ko,” mainitong gidawat si Katrina Halili sa mga Sugbuanon kagahapon. Ang iyang pagtekang sa entablado sa Gaisano Main ug Countrymall kagabii isip celebrity guest sa unang pagbola sa Shop for Scholarship raffle promo sa maong mga tindahan, maoy labing una niyang public appearance human sa pagboto sa controversial sex video nga hangtud karon padayon pa ang imbestigasyon.

Gikan sa pagtugpa sa iyang gisakyan nga eroplano, 10:25 sa buntag diha sa Mactan International Airport daghan na kaayong mga tawo nga mitimbaya niya, hangtod na sa pagbyahe sa van nga iyang gisakyan paingon sa GMA-7 Complex, daghang mga tawo ang mitawag ug mikaway niya diha sa kadalanan, sanglit dili man tainted ang iyang gisakyan. Pag-abot sa studio sa dyRT, asoy pa sa usa ka tinubdan, sa labing unang higayon kompleto ang technicians ug DJs sa maong estasyon ug nagpa-picture kauban ang aktres.

Pag-abot niini sa Lighthouse Restaurant sa Mango Avenue alang sa paniudto ug intimate interview, kalit nga midaghan ang mga tawo sa atubangang bahin sa nahisgutang kan-anan—namakpak ug gisinggit ang ngalan ni Katrina. Makadaghan usab mabalda ang interview sa sulod sa Ligthouse tungod sa kadaghan sa buot magpakuha og hulagway kauban ang aktres, kasagaran mga babaye nga edaran na. Duna poy mga babaye nga nagdala og mga anak nga ang unang pangutana pagsulod sa restaurant mao pagpakisayod kung miabot na ba ang aktres. Human sa interview, duna pay pipila ka mga lamesa sa restaurant nga gi-okupa og edaran na nga mga babaye ug lalake nga giduol sa aktres, tungod mitimbaya kini niya ug buot magpa-picture.

Ug sa labing unang higayon sulod sa lima na ka tuig nga pagbalik-balik niining tagsulat diha sa Lighthouse Restaurant alang sa intimate interviews sa nagkadaiyang artista, kagahapon pa kini makasaksi nga tataw nga mituyo gyud og ka-on ang mga tawo didto sa maong lugar, ug naglinya pa aron magpapicture, ang uban nagpa-autograph. Hinungdan nga usa sa mga pangutana nga gibato ngadto sa aktres mao nga nabatyagan ba niya nga misamot siya og kasikat human sa kontrobersiya kini ang tubag sa aktres: “ Hindi naman mas sikat, pero napi-feel ko lang na mas maraming nagmamahal sa akin ngayon at sumusuporta.”

Pero aminado siya nga bisan pa man sa mainitong suporta nga iyang nabatyagan pag-abot niya sa Sugbo kagahapon, nabalaka gihapon siya ug gani sa sakyanan paingon sa GMA-7 napangutana niya ang iyang kaugalingon kung husto ug andam na ba siya nga mohimo og out of town shows, labaw sa tanan nakapangutana siya nganong misugot siya sa maong imbitasyon kagahapon. “Bakit ba ako pumayag?,” paambit niya nga nagkatawa. Natatakot pa ako, syempre may kaba..pero kailangan kong lumaban.”

Sa pagpadayon sa interview, subling gihinumduman niini ang mga gipakita nga lihok ni Dr. Hayden Kho Jr. ngadto niya hinungdan nga nahulog ang iyang pagbati. Sa iyang pagkwenta, unom ka buwan gyud ang ilang relasyon hangtud nga niya pa dili na madala sa iyang konsensya ang ilang tinago-tago nga relasyon. “Ang hirap na magtago ng magtago. Ayaw ko na talaga kasi nakonsensya na ako, ang hirap naman na may nasaktan ka. So sinabi ko sa kanya na kung magiging tayo, tayo talaga. Tapos sinabi niya na antayin ko siya.”