PA na nameke ng pirma idinemanda ni Maxene
MANILA, Philippines - Kinasuhan kahapon ng aktres na si Maxene Magalona at ng ina niyang si Pia Arroyo-Magalona ang kanyang personal assistant na si Edna Padiernos dahil sa panloloko umano sa kanila.
Naunang isinampa ng mag-inang Magalona ang kasong fraud laban kay Padiernos sa Quezon City Prosecutor’s Office.
Sinasabi sa impormasyong inihanda ni Assistant City Prosecutor Rodrigo del Rosario na noong Hunyo 23, 2009, humingi si Padiernos kay Pia ng P30,000 para gamitin sa pagpapalibing sa namatay na ina ng suspek.
Sa hiwalay na kaso naman na isinampa sa Quezon City Metropolitan Trial Court, inireklamo ni Maxene na dinaya ni Padiernos ang kanyang pirma para ma-encash ang tseke na nagkakahalaga ng P40,000.
Natuklasan ng aktres na ang isa sa kanyang tseke ay nawawala at nalaman na pinapalitan ito ni Padiernos.
Agad na ipinaalam ng mag-ina ang insidente sa pulisya kaya’t naisagawa ang isang entrapment operation at dito ay nahuli si Padiernos nang tanggapin ang halagang P30,000 na marked money.
Inamin naman ni Padiernos ang pamemeke ng pirma ni Maxene. (ANGIE DELA CRUZ)
- Latest
