Katrina parang parating iiyak

Kung naging matagumpay man si direk Maryo J. delos Reyes na makalikha ng isang perfect loveteam sa katauhan nina Aljur Abrenica at Kris Bernal, na dinirek niya sa Dapat Ka Bang Mahalin sa panghapong programa ng GMA 7, inaasahan niya na magtatagumpay siya na magawang isa pang loveteam sina Carla Abellana at Geoff Eigenmann na ang mga magulang na sina Gina Alajar (Geoff) at Rey Abellana (Carla) ay naging artista niya noong araw.

 “Sila lang ang tumanda, hindi tayo,” pabiro niyang sabi sa presscon ng Rosalinda na kung saan inilunsad ang dalawa bilang pinaka-bagong loveteam ng GMA.

Mukha namang hindi mabibigo si Direk Maryo J., kinakitaan din ng chemistry ang dalawang kabataang artista.

Kung tutuusin, mas maganda ang istorya ni Rosalinda kesa Marimar, parehong ginampanan ni Thalia nun. Sabi ni Direk Maryo J., nakakapag-deliver si Carla.

Aber, makita nga kung totoo.

* * *

Maraming bago sa Rosalinda. Tulad ni Gian Magdangal na aarte muna at ‘di kakanta. Ganundin si Ayen Munji Laurel.

Priority pa rin naman ni Jessa Zaragoza ang pagkanta, katunayan mayroon siyang kari-release lang na bagong CD pero tinanggap niya ang role ng isang super duper na salbaheng kontrabida sa Rosalinda. Nagpapayat pa nga siya para sa kanyang role. Kung masusundan ito, magpapasalamat siya pero, gaya ng sinabi niya priority niya ang pagkanta.

Si Roderick Paulate ba, Kapuso na? Sana. Kasama rin siya sa Rosalinda at nag-host ng presscon.

* * *

Ang ganda ni Katrina Halili sa presscon ng Rosalinda na kung saan tinanggap niya ang role ni Fedra, kontrabida ni Rosalinda. Isang masigabong palakpakan ang isinalubong sa kanya ng press nang ipakilala siya.

Masaya siya sa pagtanggap sa kanya pero narun pa rin ang lungkot sa kanyang mukha na akala mo ay parating iiyak. Hindi ko siya masisisi. Sa rami ba naman ng nakapanood ng kanyang sex video, naroon pa rin ang takot, hiya at agam-agam na baka nililibak na siya. ‘Yan ang reyalidad na hindi mo na maiiwasan.

Dapat matuto kang tanggapin ang resulta ng iyong pagkakamali. And learn from it. But welcome back.

* * *

Binabati ko rin si Maricar Reyes na sa halip na magtago dahilan sa pagkakasangkot niya sa sex video scandal ay buong tapang na pumapagitna sa larangan ng showbiz. Bakit nga ba siya matatakot eh may malaking network na buma-back up sa kanya?

Tulad din ni Katrina na suportado ng GMA. Kailangan lamang nila ngayong patunayan na hindi nagkamali ang mga networks nila na bigyan sila ng pagtitiwala.