Ryan Agoncillo grabe ang lagnat

Tatlong presscon sana ang pupuntahan ko kahapon pero na-cancel ang presscon ng PLDT para kay Ryan Agoncillo dahil mataas ang lagnat nito kaya nahihirapan siyang bumangon.

Napaka-professional ni Ryan at para ipa-cancel niya ang presscon, siguradong mabigat talaga ang kanyang pakiramdam.

Dalawang presscon na lang ang napuntahan ko. Ang pa-presscon ng magkapatid na Mark at Camille Villar para kay Chacha, ang bagets na sumikat sa Bulilit Masikip TV commercial ng Camella Homes.

Ginanap ang presscon sa Laurel Mansion ng mga Villar sa Mandaluyong City. Maaga akong nagpunta sa Laurel Mansion kaya nakaidlip pa ako.

Bibang-biba pala si Chacha. Mali ang tsismis na may personality problem siya. Sinasagot nga niya ang lahat ng mga tanong sa kanya ng mga reporter. Todo iling ang bagets nang itanong ko sa kanya kung type niya na maging bold star.

Isang cute na doll house ang iniregalo nina Mark at Camille sa kanilang endorser. Dahil bulilit si Chacha, nagkasya siya sa loob ng doll house.

* * *

Idinenay ni Camille Villar ang tsismis na girlfriend siya ni Willie Revillame. Hindi true ang balita dahil friends lamang sila.

Nagkakasama sina Camille at Willie sa mga lakad pero hanggang doon lamang ang kanilang relasyon.

Hindi naman nakapagtataka na magkagusto kay Camille ang mga showbiz personality dahil maganda, mabait, matalino at seksi siya.

* * *

Maagang natapos ang presscon sa Laurel Mansion kaya nakapunta pa ako sa presscon ni Khristine Gabriel ng Everbilena.

Ang Everbilena ang distributor ng Sierra Madre health capsule. Si Boy Abunda ang endorser ng Sierra Madre at sa presscon kahapon, napag-usapan ang magandang epekto ng gamot sa katawan.

Anti-oxidant at acid neutralizer ang Sierra Madre. To top it all, pang-matanda at pambata ang gamot na ini-endorso ni Boy.

Si Deocildo Sy ang may-ari ng Everbilena Cosmetics. Matagal na kaming magkakilala ni Papa Deocildo. Nagkasama pa nga kami noon sa isang biyahe sa Indonesia.

Happy ako para kina Mr. Sy at Khristine dahil lalong lumalago ang kanilang kompanya. Parami nang parami ang negosyo nila.

Endorser din ng Everbilena ang aking favorite na si Sarah Geronimo. Magkakaroon uli ng big event para kay Sarah ang Everbilena.

* * *

Hindi ko agad nakilala si Congressman Anton Lagdameo nang magkita kami kahapon sa Annabel’s Restaurant.

Pumayat si Anton kaya lalo siyang gumuwapo. Si Anton ang mister ni Dawn Zulueta na tuwang-tuwa dahil baby girl ang kanilang pangalawang anak.

Ikinuwento ni Anton na hindi pa lumalabas ng ospital ang kanyang mag-ina dahil premature nang isilang ang anak nila.

Mukhang masusundan pa ang dalawang anak nina Anton at Dawn dahil gusto yata ni misis na magkaroon sila ng maraming anak.