Buhay ni Rochelle Barrameda pinagbabantaan

Mama Salve, nakakatanggap na raw si Rochelle Barrameda ng mga pagbabanta sa buhay dahil sa pagpapainterbyu niya tungkol sa pagpatay sa kanyang kapatid na si Ruby Rose Jimenez.

Humihingi na ng tulong si Jimwell Stevens (asawa ni Rochelle) para magkaroon ng proteksyon ang kanyang misis.

Hindi ipinagwawalang-bahala ng Barrameda family ang death threats na natatanggap nila. Dobleng ingat ang kanilang ginagawa para sa kaligtasan nila.

Nagpapasalamat ang pamilya Barrameda dahil natapos na ang kanilang paghahanap, kahit masakit ang closure. Pagkatapos ng libing, aasikasuhin nila ang paghahanap ng justice sa pagpatay kay Ruby.

* * *

Ipapaalaala ko sa inyo ang live guesting ni Atty.Adel Tamano sa Startalk, ngayong hapon.

Si Atty. Adel ang magre-represent kay Dra. Vicki Belo na pinagbibintangan na nagpakalat ng mga sex video ni Dr. Hayden Kho, Jr.

I repeat, hindi dapat paniwalaan ang bintang kay Dra. Belo dahil mismong si Erik Chua ang nagsabi na umalis si Mama Vicki sa bahay nito habang dina-download nila mula sa computer ni Hayden ang mga sex video nito.

Marami ang puwedeng mangyari habang wala si Mama Vicki. Kasama ni Erik sa downloading ng video si Dr. Bistek Rosario na malaki ang galit noon kay Hayden dahil pinatulan nito ang kanyang girlfriend na si Princess Velasco.

Stranger man ako sa paggamit ng computer, alam ko na madaling kopyahin ang computer files sa pamamagitan ng pagta-transfer nito sa USB flash drive at CD/DVD burning. ‘Yan ang mga natutunan ko sa pakikinig sa mga kakilala ko na updated sa mga modern technology at gadgets.

Malay natin kung kinopya ng mga bisita ni Mama Vicki ang mga video para, may pambawi sila kay Hayden?

Pero kung ako ang tatanungin, mas mabuti na unahin muna ang pagpaparusa sa kumuha ng video. Saka na isunod ang paghahanap sa nagpakalat ng mga sex video para hindi magsanga-sanga ang isyu.

* * *

Totoo ang balita na nag-self-quarantine ang mga empleyado at artista ng GMA 7 na nanggaling sa Amerika.

Hindi nag-taping si Aljur Abrenica para sa bagong show nila ni Kris Bernal dahil kagagaling lamang niya sa New York. Nag-self quarantine muna siya para kung sakaling may sipon si Aljur, hindi mahahawa ang mga kasamahan niya sa trabaho.

 Dumating na si Mama Wilma Galvante mula sa Amerika noong Biyernes. Nagkita kami sa Centennial Airport noong Huwebes ng madaling-araw dahil sinundo ko naman ang anak ko na galing din sa Amerika.

Limang araw na hindi papasok si Mama Wilma sa kanyang GMA office dahil naka-self quarantine din siya. Hindi kagaya dati na mula sa airport, uuwi siya ng bahay para sa isang mabilisang pagpapahinga at pagkatapos, go na siya sa kanyang office.

* * *

Na-enjoy ko nang husto kahapon ang holiday dahil walang trapik. Marami kaming napuntahan ng aking mga balikbayang visitor na in fairness eh walang sipon at lagnat.

Kahapon ang press visit sa shooting ng bagong pelikula ni Vic Sotto. Nagpunta sa Maynila ang mga reporter na naaliw din sa kanilang biyahe porke walang trapik as in maluwag ang mga kalsada.

Si Paula Taylor ang leading lady ni Bossing sa LOL. Siya ang girl na natsitsismis na girlfriend ni Marc Nelson. Dahil maganda si Paula, madaling mahulaan ang mga itatanong sa kanya ng mga reporter. Hindi ba siya pinagseselosan ni Pia Guanio? Puwede ba siyang ma-in love kay Bossing at kung anik-anik pa?

Tatlong dekada na ako sa showbiz kaya memoryado ko na ang mga normal na tanong sa mga artista. Pare-pareho lang ng tanong sa iba-ibang mga artista!