Hugyaw says bravo!!

CEBU, Philippines – Pinaagi sa hiniusang pwersa sa office of the Acting Mayor of Cebu City, ABS-CBN Cebu ug “On Cue! Productions”, masaksihan ang usa ka mugna nga produkto sa gipasiugdahan nga theatre workshop niining summer. Mga bata nga puno sa talento ang gipailawom sa pagbansay-bansay sa theater, dance ug voice lessons, diin ang maong mga bata ubanan usab sa ubang mga bata sa Sugbo nga duna usay potensyal apan walay ikasarang pagsalmot sa maong workshop, lakip na niini ang mga street children.

Milungtad og usa ka buwan ang workshop ug ugma sa gabii, Mayo 24, andam na ang maong mga bata pagpaambit sa ilang talento ug nakat-onan pinaagi sa usa ka espesyal nga pasundayag nga giulohan og “ Synchrony,” Excerpts of Broadway nga diha mahitabo sa College Assurance Plan o CAP Theatre. Ang pasundayag nga magsugod alas sais y medya (6:30pm) sa gabii, mopakita og highlights sa mga sikat nga Broadway plays sama sa Cats, Fiddler on the Roof, Sound of Music, Anie, Oliver ug Les Miserables.

Nasayran nga ang mga batang gikan sa uyamot nga pamilya nga apil sa maong pasundayag hatagan og gasa human sa show. Ang nagpasiugda nga grupo mao usay miabaga sa costume niining maong mga bata.

Mga banggiitang binuhat ang misalmot sa pagbansay niining maong mga bata ug nagduma sa workshop. Sila mao si Noneluna Deligero alang sa theater dance and ballet; Jurey Mirafuentes, director sa ABS-CBN Cebu telenovelas alang sa acting; Cinbeth Orellano, choreographer sa ABS-CBN alang sa dancing and stage projection; Rico Lucena sa ABS-CBN alang sa speech and enunciation ug si Gina Mercado para sa voice, musicality and over-all directing. Si Gay Marie Tieu maoy nangulo sa conceptualization niining maong proyekto.

Ang “On Cue! Productions” labing bag-o nga theatre group sa Sugbo kansang kawsa mao ang pag-ugmad og mga binuhat nga dunay potensyal nga mamahimong banggiitang mga artista sa teatro ugma damlag.