Justine Timberlake dadalhin din ni Jomari sa 'Pinas
Matapos ang malaking tagumpay ng back-to-back concert dito ng dalawang American Idols na sina David Cook at David Archuleta na naka-iskwela nun sa America ni Gerald Anderson, but unfortunately hindi sila naging close, si Justine Timberlake naman ang pinaplanong dalhin dito sa Pilipinas ni Jomari Yllana at ng kanyang mga business partners sa kumpanya nilang Fearless Productions.
Well, kung madadala ni Jomari ang boyfriend na ito ni Cameron Diaz, maituturing na talaga siyang isang big time concert producer dahil malaking artista si Justine sa buong mundo. Sino ang makapagsasabi, baka makasama pa niya ang kanyang GF dito eh, ‘di magkakaroon pa ng bonus ang mga Pinoy.
* * *
May plano ang GMA 7 na after their stint sa All About Eve ay bigyan ng serye sa hapon sina Sunshine Dizon at Iza Calzado. Kung pagsasamahin sila o bibigyan ng magkahiwalay na proyekto ay hindi pa tiyak pero, ang sigurado mapapanood naman sila sa panghapong programa ng Siyete.
Sa kasalukuyan, patok ang seryeng pinagsasamahan ng dalawa, ang All About Eve. Kahit na pilit silang pinagkukumpara at pinaglalaban ng mga manonood, nananatiling matatag ang kanilang friendship.
Although elated ang dalawa sa plano para sa kanila ng kinaaanibang network, alam nila na isa na naman itong bagong hamon sa kanila. Kung nagawa nilang mamintina ang mataas na ratings ng All About Eve, expected na dapat din ay mataas ang mga ratings ng mga gagawin nilang serye. Katulad din ng matataas na ratings ng mga tumatakbong Paano Ba Ang Mangarap? nina Jennylyn Mercado at Mark Herras at ang Dapat Ka Bang Mahalin? nina Kris Bernal at Aljur Abrenica.
* * *
Napag-uusapan na rin lamang si Sunshine Dizon, kapuri-puri ‘yung ginagawa niyang pagtatanggol sa itinuturing niyang kaibigan na si Katrina Halili. Nakikiusap siya na tantanan na ito sapagkat ang isyu na kinasasangkutan nito ay dalawang taon na ang nakakaraan, tapos na, bakit daw kailangang buhayin pa itong muli?
“Tama na! Bigyan n’yo naman siya ng pagkakataong makapagsimulang muli,” pakiusap niya sa mga nagpapakalat ng mga video ng kaibigan.
Samantala, makakapag-paluwag marahil ng damdamin ni Katrina ang pangyayaring hindi na siya nag-iisa. May iba pang involved, nabastos, tulad ng isang Brazilian model, isang comedian, at isang up and coming actress. Habang nagtatagal ang ‘kaso’ niya, dumarami ang ‘hero’ niya. Nariyan na si Sunshine, tapos pinadadali na ng Senado ang pagpapasa ng isang bill tungkol sa pagpapalabas ng mga sex videos. May hamon din si Senador Bong Revilla na pagpapatanggal ng lisensiya ni Dr. Hayden Kho dahil sa mga kaganapan.
* * *
Nagsisimula na pala ng kanyang training sa paglipad si Marian Rivera bilang Darna. Ikinuha pa siya ng GMA ng trainor at fight instructor para rin mahasa siya sa pakikipaglaban.
Bagaman at magiging napaka-hirap nito para kay Marian dahil makakatikim na siyang mailagay sa harness, welcome sa kanya ito. Ayaw naman niyang maging kulang ang kanyang portrayal bilang Darna. At tanggap na rin niya na bilang bagong Darna ay hindi maiiwasang pagkumparahin sila ni Angel Locsin.
* * *
Ano pa ang susunod na talento na ipamamalas ni Paolo Bediones? Tila habang hindi pa pormal na nagsisimula ang ikalawang edisyon ng Survivor ay marami itong oras para maipakita ang kanyang napakaraming talento.
Nung isang umaga ay nakita ko itong tumutugtog ng piano sa Unang Hirit. At hindi siya solo performer, kasama niya ang kanyang banda. O biruin mo nagagawa pa niyang makapagtatag ng banda!
Kaya ba hindi nagtatagal ang kanyang mga relasyon dahil marami siyang pinagkakaabalahan na hindi ibang babae kundi sa ibang bagay?
- Latest
