I'm really inspired

CEBU, Philippines -  “Environmental Message” Kini maoy pasigarbo ni Valerie “Bangs” Garcia kabahin sa iyang FHM pictorial sa May 2009 issue sa maong magazine nga mapalit na sa nagkadaiyang bookstores. Si Bangs kauban ni Paolo Contis, gihugyawan og maayo sa mga taga Bogo ug kasikbit nga mga lungsod niadtong Sabado sa gabii alang sa final draw sa A Million Thanks Raffle Promo sa Gaisano Main, Countrymall, Balamban ug Bogo, nga gipasiugdahan sa Gaisano Inc.

Una niini subli siyang nahimamat sa pipila ka sakop sa E-Group diha sa Lighthouse Restaurant niadtong Sabado sa udto. Dinhi niya gipasabot ang mensahe sa iyang pictorial sa FHM. Suma pa niya, nga tulo ka konsepto ang gipakita ngadto niya, ug kining namantala maoy iyang nauyonan og maayo. “Artistic siya and it has a message about the environment kaya brown ang ginamit naming kulay parang to say na, hey alagaan nyo ang nature kasi tayo pa rin ang magsisi in the end.”

Kasamtangan siyang masud-ong isip kontrabida ni Shaina Magdayao sa Kambal Sa Uma sa abs-cbn, matag hapon. Matud pa niya dakong hagit para niya ang maong papel tungod kay “people pleaser” siya nga matang sa pagkatawo busa dili niya buot nga dunay mapasakitan. Pero angay gayud matud pa nga atangan ang ilang mga eksena ni Shaina tungod kay daghan na kaayo sila og namugna nga makakugang tungod sa twists.

Sa pangutana kung mahinayon pa ba ang Nurserye ni Judy Ann Santos, nangambot si Bangs tungod kay matud pa niya wala na siya’y apil sa maong project busa wala na siya masayod sa kalambuan. Pero mipahiyom siya tungod kay bisan natangtang siya sa cast, nabayran na matud pa ang iyang talent fee busa walay alkanse.

Angayan usab atangan niya pa ang iyang umaabot nga pelikula kauban sila si Allen Dizon, Krista Ranillo ug Ara Mina, nga giulohan og “Marino.” Saysay ni Bangs, siya maoy ex-girlfriend ni Allen dinhi sa maong pelikula; si Ara ang wife ug si Krista ang mistress nga ikahibalag sa nahisgutang lalaki adto sa Thailand. Matud ni Bangs siya unta maoy gitanyagan sa role nga kabit pero iyang gibalibaran tungod kay labihan niini ka daring ug ka sexy. Duna pod siya’y horror movie nga giulohan og Rock & Roll, kauban ang mga Kapuso stars nga sila si Riza Cenon, Iwa Motto, Rainier Castillo ug Mark Herras. Ang duha niya ka pelikula puros indie films, ug isalida sa umaabot nga Hunyo ug Hulyo.