Ara atat nang bumalik sa Bubble Gang

Sa presscon ng Who Wants to be a Millionaire? ng TV5 ay naitanong namin kay Vic Sotto na host ng bagong game show kung bakit siya mas mukhang bata ngayon. Ano ang sikreto niya?

Malaki ang kinalaman ng nobyang si Pia Guanio para maging masaya ang buhay niya pag-amin ng komedyante.

Katunayan, si Danica Sotto na rin ang nagbuking na dahil kay Pia ay nagba-bar na ang kanyang daddy.

“Masaya na ako pero mas masaya ako ngayon dahil kay Pia. Isa pa, natupad ang pangarap kong maging host ng Who Wants to be a Millionaire? dahil noon pa ay fan na ako ng game show. Sabi nga ni Joey (de Leon) madali lang maging host ng Who Wants to be a Millionaire? dahil paupu-upo ka lang. ’Di pala ganun kasimple dahil kumplikado rin,” kuwento ni Vic. 

Abangan ang pag-shake ng millionaire dream tuwing Sabado, 6 p.m. sa TV5.

Sa kabilang banda, tinanong kung ano ang regalo ni Pia sa kanya noong nakaraang kaarawan nito.

“Pina-check-up niya ako sa Medical City para makatiyak na maganda ang aking kalusugan. Okay naman at tumaba pa nga ako ng three kilos,” aniya.

* * *

Kahit nag-kampeon si Metro Manila Development Authority (MMDA) Chairman Bayani Fernando sa Celebrity Duets ay hindi pa rin ito handang gumawa ng CD album niya. Nagbiro ito na baka walang bumili at isa pa, mahal mag-produce ng album.

Bilang chairman ng MMDA siya rin ang nangangasiwa ng Metro Manila Film Festival (MMFF).

Si BF ay miyembro ng board of advisers ng Mowelfund na may 4,000 kasapi.

* * *

Malaki pala talaga ang posibilidad na tumakbo bilang konsehal sa 2nd district ng Quezon City si Ara Mina. Pinag-iisipang mabuti ni Ara kung sasabak na sa pulitika sa isang taon.

Ayon pa rin kay Ara, baka bumalik na siya sa Bubble Gang dahil nami-miss na niya ang show lalo na ang mga kaibigang artista na mainstay dun. Bukod sa drama na Dapat Ka Bang Mahalin? ay nakalinya na ang series of shows nito sa Amerika this coming June.

* * *

Congrats kay Jennylyn Mercado dahil sa matagumpay at well-attended niyang birthday concert na I Am Woman na idinaos noong Mayo 14. Umiyak ito nang makatanggap ng birthday cake mula kay Katrina Aguila at sa kanyang producer.

Espesyal na inawit ni Jen ang Angels, ang kantang dedicated sa anak na si Alex Jazz.