Gretchen lalaban sa bingo

MANILA, Philippines – Anim na ang itinanghal na BINGOnaryo pitong linggo simula ng ilunsad ang nag-iisang bingo game show ng bayan na Pinoy Bingo Night. 

Kabilang sa mga pinalad na mauwi ang jackpot at nakapagpabago ng kanilang buhay ay mga bingoers na sina Claire Magsino at Evangelista Piano. Wagi rin ang mga celebrity players na sina Vhong Navarro, John Prats, Angel Locsin at pinakahuling winner na si Andrew E. na kanya-kanya namang nagbigay tulong sa kanilang napiling mga charity.

Ngayong Lunes (May 18), abangan si Jay ng bandang Kamikazee sa kanyang pagharap sa palabang mga Bingoers. Susubukan din ni Gretchen Barretto ang kanyang suwerte pagdating naman ng Martes (May 19). Maglalaro rin sa susunod na mga episodes sina AiAi Delas Alas at Cesar Montano.

Talaga namang napakadaling manalo ng limpak-limpak na salapi sa Pinoy Night. Gabi-gabi, isang celebrity player ang maglalaro ng espesyal na bingo game at maaring mag-uwi ng P1,000,000 jackpot. Magiging kalaban niya ang 200 bingoers (studio players) na maglalaro naman ng nakagawiang bingo game kung saan tatantusan ang kanilang hawak na game cards. Kapag naunang bumingo ang bingoer ay magwawagi ito P50,000 at maaring pumili kung K na or Play pa— play pa kung itutuloy niya ang laro ng solo contestant para sa pagkakataong manalo rin ng isang milyon o K na kung uuwi na siya.

Para naman sa mga nanonood sa kani-kanilang kabahayan, maari na rin kayong bumingo at manalo ng hanggang P150,000 cash sa Pinoy Bingo Night Homeviewer Game.

Abangan lang ang 20 bingo numbers na lalabas sa espesyal na home game segment at bumuo lang ng X pattern para manalo ng hanggang P150,000. Sa oras na bumingo, siguraduhing mag-register thru text at i-send ang BINGOAKO <serial number ng bingo card><your name/age/gender/address> sa 2366 para manalo ng karagdagang cash prize na hindi bababa sa P50,000.

* * *

Maraming beses nang naikuwento ni Ricky Reyes ang istorya ng kanyang buhay subalit kinagigiliwan pa rin itong marinig ng mga Pinoy dito at sa labas ng bansa na ginawa na siyang inspirasyon ng mga parlorista at may-ari ng mga salon.

Kaya muling isi-share ni Mother Ricky ang kanyang makulay na karanasan sa Life and Style With Ricky Reyes ng QTV-11 ngayong Linggo, alas diyes hanggang alas onse ng umaga.

Tulad ni Mother Ricky ay nagsimula muna sa maliit na kapital ang mga taga-showbiz na sina Jeffrey Hidalgo, January Isaac at Jennifer Sevilla pero ngayo’y unti-unti na nilang natitikman ang bunga ng kanilang pagtitiwala sa tulong ni Lord, pagtitiyaga at paghihirap.

Gumagawa ng liquid na panlaba, panghugas ng plato at panglinis ng salamin si Jeffrey. Maraming suki si January sa kanyang mga inilulutong pagkain at cake na may herbal at organic na sangkap. May binuksan nang shop sa Greenhills si Jennifer na ang mga espesyalidad ay hair extension at mga ibinebentang imported na wig.

Dalawang matagumpay din sa kani-kanilang negosyo ang tampok sa pagsasadula sa programa. SaTesda Bida ay ilalahad ni Arlene Bomediano ang malaking tulong ng Tesda scholarship sa business management na nagagamit niya bilang canteen concessionaire. Sa WE (Women Empowerment) hosted ni Mayor Marides Fernando nama’y ipakikilala si Jose Maik na ang hilig sa mundo ng fashion ang nagbigay-daan sa Missology womens’ apparels at accessories.

* * *

Isa na namang power-packed party ang kukumpleto sa inyong Linggo ng hapon dahil sangkatutak na entertainment at sorpresa ang ihahatid ng ASAP’09 ngayong Linggo.

Dalawa sa guwapong Kapamilya na sina Sam Milby at Billy Crawford ay may birthday celebration. Naghanda ang Rockoustic Heartthrob ng isang sexy solo dance number para pa-initin ang inyong hapon. Si Billy naman ay makiki-jamming sa mga music greats na sina Martin Nievera at Gary Valenciano.

Ang numero unong hip-hop dance group ng bansa, ang Streetboys, ay magdiriwang rin ng kanilang 16th anniversary bilang dance group kaya naman handog nila ang mga bone-breaking dance steps. Bibigyang parangal din ang nasabing grupo dahil sa outstanding sales ng kanilang recent album. Ngayong Linggo rin ay ire-release na ni Jed Madela ang kanyang bagong CD na may MP3 at MP4 formats sa pamamagitan ng isang special performance.

Para sa karagdagang updates, mag-log on lang sa www.abs-cbn.com <http://www.abs-cbn.com> o sa http://asaptv.multiply.com.