HINUGOT...huling linggo na

MANILA, Philippines - Saksihan ang mga makapigil-hiningang eksenang mapapanood sa huling laban para sa pag-ibig nina Homer at Proserfina sa pagtatapos ngayong linggo ng Carlo J. Caparas’s Ang Babaeng Hinugot sa Aking Tadyang.

Tututukan ng mga manonood ang mas matinding laban na kakaharapin ng magkasintahang Homer (Dingdong Dantes) at Proserfina (Marian Rivera) dahil maghihiganti at papatayin sila nila Heleen (Angelu de Leon) at ng obsess na si Rado ( Paolo Contis).

Nasira ni Heleen ang engrande at masayang kasalan sana nila Homer at Proserfina matapos niyang kidnapin ang dalaga at magpanggap na bride ng binata. Muntik namang mamatay si Proserfina matapos itong ipalibing ni Heleen sa loob ng pader. Natunton ni Homer sa tulong ni Greg (Boom Labrusca) ang kinaroroonan ng fiance pero bago pa sila maka­takas, nahuli sila nila Heleen.

Hanggang kailan lalaban para sa kanilang wagas na pag-iibigan sina Homer at Proserfina? At kung tadhana ang nagdala kay Proserfina sa bahay ni Homer para matagpuan ang kanyang tunay na pag-ibig, tadhana rin ba ang magdidikta kung buhay o kamatayan ang sasapitin nila sa huli?

Ang Babaeng Hinugot Sa Aking Tadyang sa GMA Telebabad ay mula sa direksyon ni Bb. Joyce Bernal.  

Huwag palagpasin ang maaksyon at makapigil-hiningang laban para sa pag-ibig sa huling linggo ng Ang Babaeng Hinugot Sa Aking Tadyang simula ngayong Lunes ng gabi.