Kris planong kalabanin si Bong

Sinabi ni Kris Aquino na magiging magkalaban sila ni Sen. Bong Revilla kung tatakbo itong bise presidente - matapos liwanagin ni Bong na hindi siya pinayagan ng kanyang amang si dating Sen. Ramon Revilla, Sr. na tumakbo sa pagka-bise presidente sa susunod na taon — pagkatapos ng eleksiyon next year.

Pero sinabi ni Kris na hindi pa siya sigurado kung anong posisyon ang tatakbuhin niya, basta sinabi niya na VP (vice president) o P (presidency).

Hindi naman bago sa marami ang pagtakbo sa pulitika, kung saka-sakali, ni Kris. Pawang nasa linyang ito ang pamilya niya - ang nasira niyang ama, Ninoy Aquino was a senador when he died, first woman president ang mom niya na si Cory Aquino at senador sa kasalukuyan ang kapatid niyang si Noynoy Aquino.

With their success sa mga eleksyon na sinalihan nila, hindi ba mai-inspire si Kris?

* * *

Parang Tayong Dalawa ang takbo ng panliligaw ni Jake Cuenca kay Melissa Ricks. Nasa balag siya ng alanganin dahil anytime na maki-join si Matt Evans sa ligawan, magiging isa itong malaking showdown between the two young actors na ang premyo ay ang puso ni Melissa. ’Di ba ganito rin ang kapalaran niya sa nasabing serye? Okay na sana sila ni Kim Chiu until matuklasan nito na hindi pala siya ang David Garcia, Jr. na nagligtas sa kanya nung maaksidente ito nung kabataan nila kundi si Matt.

Ang advantage ni Matt hindi lamang kay Jake kundi sa lahat ng manliligaw kay Melissa ay ang pagiging close nito at ni Matt. Halos lahat ng project ay magkasama sila. Tulad na lamang nito sa Kambal sa Uma magkapareha muli sila. Unlike Shaina Magdayao who has a new partner in the person of Jason Abalos.

Nang tanungin si Melissa kung hindi ba maaapektuhan ang tandem nila ni Matt ng panliligaw sa kanya ni Jake, sumagot ito ng “Matatag na ang foundation namin ni Matt. Hindi na ito magigiba ng pag-entra ni Jake.”

* * *

Baka may mga sinehan pang naglalabas ng phenomenal box-office hit ng John Lloyd Cruz-Sarah Geronimo-starrer na You Changed My Life pero nag-decide ang Star Cinema sa pamamagitan ng Star Video na ilabas na ito sa original DVD at VCD. Sa ganitong paraan nga naman mas marami ang makaka-enjoy nito, lalo na ang buong pamilya at maski na yung maraming nakapanood na.

Ginawa rin ang hakbang na ito para hindi masyadong ma-miss ng kanilang mga tagahanga sina John Lloyd at Sarah na parehong abala sa kani-kanilang world tours. Baka matagalan pa ang muling pagsasama sa isang pelikula ng dalawa dahil si John Lloyd ay ginagawa na ang In My Life with Gov. Vilma Santos sa New York. Baka pagbabalik ni Sarah ay simulan na rin ang project niya with Toni Gonzaga, Vhong Navarro and Rayver Cruz.