Dahil kay Martin, Pacman hindi dapat matalo

Nakakaramdam ng konting tukso sa katawan ang pulitiko tuwing makikita sa isang simbahan ang dating beauty queen turned actress. Pero pigil na pigil ang pulitiko dahil nasa simbahan raw siya at may kasama pa.

Kaya lang hindi raw niya maiwasang ‘di tingnan ito lalo na pag labasan na dahil pansinin ang nasa­bing aktres dahil sa kasek­sihan. Kaya hindi raw niya maiwasan na mag-isip ng ‘masama’ minsan.

Nakailang beses nang nakita ng pulitiko ang actress sa nasabing church ayon sa source, pero hanggang tingin lang naman talaga ang pulitiko dahil hindi naman sila personal na magkakilala ng dating beauty queen.

* * *

Speaking of simbahan. Kahapon, Easter Sunday, nakiusap ang pari sa St. Paul Church na sana’y panoorin natin ang pelikulang Padre de Pamilya starring Ariel Rivera, Jaclyn Jose, Tessie Tomas, Cedric Jose at Isabella de Leon na pelikula ni Cesar Evangelista Buendia at palabas sa April 29, sa SM Cinema Exclusive.

Nagbebenta sila ng ticket para mas maraming ma-encourage na manood ng Padre de Pamilya na tungkol sa kuwento kung ano ang uunahin mo, ang Diyos o ang pamilya mo?

Sana naman, panoorin natin ang pelikulang ito. Siguradong magandang aral ang matututuhan natin makakatulong pa tayo sa simbahan. Bibihira ang ganitong pelikula.

* * *

Halos lahat lie ang sagot ni Patrick Garcia sa Don’t Lie To Me portion ng Showbiz Central kahapon. More on sa kanila nila ni Glaiza de Castro ang tanong na parang pilit na pilit naman. Lie din ang lumabas sa tanong kung may pagtingin pa ba siya sa ina ng anak niyang si Jennylyn Mercado.

Sa The Buzz naman, nag-tsikahan na sina Kris Aquino at AiAi delas Alas na nagmukhang bata. Yup, bagets looking ngayon ang komedyante at ang gaan ng aura.

Matagal-tagal ding hindi nag-usap sina AiAi at Kris dahil sa side comment noon ni AiAi nang magka-problema sina Kris at at asawang si James Yap.

* * *

Ipagdasal nating manalo si Manny Pacquiao sa kanyang laban kay Ricky Hatton sa May 2 (May 3 sa ‘Pinas). Hindi lang dahil kay Pacman kundi dahil na rin kay Martin Nievera na siyang kakanta ng Lupang Hinirang sa nasabing laban.

Nauna nang naikuwento ng isang source na sinabi ni Pacman na hindi siya favor kay Martin dati dahil may malas factor daw pag lalaki ang kumakanta sa kanyang laban. Pero ang siste, nakapag-commit na raw ang kampo ni Manny.

Ang sad part dito, baka hindi suwertihin si Manny. Ang tiyak na isa sa pagbubuntunan ng sisi ay walang iba kundi si Martin.

‘Wag naman sanang tumama ang kutob ni Manny. Baka sabihin nilang bakit hindi na lang si Lea Salonga ang pinakanta.