Kiko seryoso ni Krissa

CEBU, Philippines - Pwes nadutlan gyud diay ang bag-ong Born To Be Wild host nga si Kiko Rustia ni kanhi Gobingo Girl Krissa Mae Arietta. Tiaw mo kana nga pag-adto ni Kiko sa US, gipangita gyud niini ang pinuy-anan ni Krissa ug gihimamat ang pamilya sa dalaga. Pwes, naigo sa pana ni Kupido si Krissa maong kanunay na silang makit-an nga magkuyog ni Kiko ug daw gihulmigas tungod sa ka-sweet ngadto sa usag-usa.

Sexbombs nga nanulod og KTV

Kung kahinumduman nga milugwa dinhi sa Banat Hugyaw ang balita nga matud pa dunay ka Sexbomb Girls nga nakit-an misulod sa KTV club sa Quezon City. Pwes, nasayran sa PangMasa nga sila si Aifha ug Aira Bermudez diay ang gipasabot. Giangkon sa ilang manager nga si Joy Cancio nga miulbo ang iyang kaspa sa maong balita, pero nakapangatarungan ang iyang mga alaga busa iyang gipasaylo. “Lagi ko naman sinasabi sa kanila na isipin nila na mga artista sila at lahat ng makitang gawin nila ay nama-magnify. Tulad niya, dinala lang nila ang friend nila sa isang KTV club, akala tuloy nagtatrabaho na sila roon,” lenggua pa sa manager sa Sexbomb Girls ngadto sa PangMasa.

Jennylyn bag-ong belo girl

Si Jennylyn Mercado ang gikatahong latest endorser karon sa Belo Medical Clinic. Mapasalamaton kaayo si Jennylyn kay gawas sa endorsement, ang Belo usab ang mo-sponsor sa launching sa iyang coffee table book karong May 9, sa dili pa ang iyang birthday concert karong May 15 sa Music Museum.

Muhlach kids padak-on nga sporty

Samtang tua pa si Charlene Gonzales sa Boston, New York alang sa pagtungha niini sa kursong Entrepreneurship-Business Management sa Harvard Business School gisuroy ni Aga Muhlach sa Camarines Sur ang iyang mga anak nga kaluha nga sila si Atasha ug Andres. Ang maong dapit maoy paborito ni Aga sa higayon nga ganahan siya mag-wakeboarding. Gusto ni Aga nga mahisama ang iyang mga anak kaniya nga mahimong mahiligon sa sports.

Martin pebrero pa gikulbaan

Dugay rang nakahibawo si Martin Nievera nga siya maoy mokanta sa Lupang Hinirang sa away ni Manny Pacquiao ug Ricky Hatton sunod buwan. Gani giangkon man ni Martin ngadto sa PangMasa niadto pang Pebrero nga wala siya makuyawi nga Tagalog ang kanta tungod kay naanad naman siya bisan pa og englisero siya. Ang nakuyawan niya mao nga makalimot unya siya sa lyrics.