Rufa Mae 'di pa rin makakaharap si DJ Mo

Hindi ko pa alam kung kailan ang airing ng Maalaala Mo Kaya (MMK) guesting ni Lorna Tolentino pero sigurado ako na matutuwa ang kanyang fans.

Nagustuhan ni LT ang script na ipinadala sa kanya kaya tinanggap niya ang guesting sa drama show ni Mama Charo Santos.

Nagkasakit nga si LT pagkatapos ng taping dahil napagod siya sa mga mabibigat at dramatikong eksena.

Bukod sa MMK, aapir din si LT sa May Bukas Pa. Malapit na siyang mag-taping para sa nagre-rate na show ng ABS-CBN.

Updated ako sa mga nangyayari sa May Bukas Pa. Kasali si Tonton Gutierrez sa cast kaya pinapanood ko ito.

* * *

Marami ang nagtatanong sa akin kung sino si Jacque Ruby na sinabihan ko ng ‘I love you’ sa Startalk noong Sabado.

Si Papa Jacque ang big boss ng Makisig Network na hindi mahilig sa publicity. Nag-I love you ako sa kanya dahil sa pagkain na ipinadala niya sa aming show noong Sabado.

Nagkakilala kami ni Papa Jacque sa launch ng Channel V Philippines dahil napapanood na ito sa Makisig Network.

Ikinuwento ni Papa Jacque ang mga bonggang plano ng Makisig para sa Channel V.

Hindi ko inaasahan na magpapadala ng pagkain si Papa Jacque sa Startalk kaya na-touch ako sa kanyang ginawa. Maraming salamat Papa Jacque! Hindi na ako magsasabi ng I love you dahil ayokong pagselosan ka ng aking true papa, si Papa Joey de Leon na rumarampa pa rin sa Amerika habang binabasa ninyo ito.

* * *

Hindi ko talaga naging ugali na pumunta sa ibang lugar kapag Holy Week. Mas gusto ko sa bahay dahil naglilinis ako at nagkakalkal ng mga gamit.

Cleaning time ko ang Holy Week. Nakakapaglinis ako dahil walang mga meeting at presscon na pupuntahan. Konti rin ang tumatawag sa landline ko dahil nagbabakasyon din ang mga callers ko.

Hindi ko napapakinabangan ang cellphone ko dahil off ito kapag nasa bahay lamang ako.

Pagkatapos maglinis, nagninilay-nilay na ako with matching pagtitika. Siyempre, inihihingi ko ng kapatawaran mula kay God ang mga kagagahan na nagawa ko. I’m not perfect ‘noh!

Nakikinig din ako ng misa sa simbahan na malapit dito sa bahay namin. Naglalakad ako papunta sa simbahan dahil walking distance lang ito.

* * *

Hindi pa naaayos ang problema sa pagitan nina Rufa Mae Quinto at DJ Mo Twister. Hindi sila magkikita sa Linggo dahil si DJ Mo naman ang aalis papunta sa ibang bansa.

I’m sure, nakarating kay Rufa Mae ang siney ni DJ Mo kay Dolly Ann Carvajal at knowing her, masasaktan na naman siya.

Dahil wala si DJ Mo sa Showbiz Central sa Linggo, baka dedmahin muna ni Rufa Mae ang isyu tungkol sa kanilang dalawa. Iniyakan ni Rufa Mae ang interbyu noon ni DJ Mo kay Dr. Vicki Belo.