Dingdong giimbitar ni Karylle, wa mutunga

CEBU, Philippines – Giangkon ni Karylle nga iyang giimbitar sa iyang birthday dili pa lang dugay ang ex-boyfriend niya nga si Dingdong Dantes pero wala kini mutunga. Gani wala usab kini mo-greet kaniya og “happy birthday” pero giklaro sa singer nga wala siya ma-offend niini. Sa laing bahin, naghinam-hinam na si Karylle alang sa una niya nga full-length soap sa ABS-CBN, ang Komiks Presents Maruja, nga molugwa karong May 2, hulip sa Flash Bomba. Makauban niya sa maong proyekto sila si Kristine Hermosa, Derek Ramsay, John Estrada, Gloria Romero, Bing Pimentel, ug Enchong Dee.

Carla todo workshop na

Giatngan na sa kadaghanan karon ang pagdala ni Carla Abellana alang sa Pinay Rosalinda. Sa pagkakaron, nagsugod na ang dalaga sa iyang acting workshop under Joel Lamangan isip parte sa iyang pagpangandam aron masunod gayud niya ang estilo ni Thalia nga maoy orihinal nga midala sa maong serye didto sa Mexico.

Charice sa Italy na pod manghugyaw

Miabot na kagahapon sa buntag gikan sa iyang shooting sa Alvin & The Chipmunks si Charice Pempengco. Pero karong Huwebes molarga na pod siya alang sa iyang pag-guest sa usa ka TV show sa Italy.