Angelika magkasunod ang kasal at binyag ng anak
Ang sexy star na si Katrina Halili ang pinakabagong celebrity endorser ng Bench Body at isang kakaibang launch ang ginanap sa Conservatory ng Manila Peninsula Hotel sa Makati City nung nakaraang Sabado ng gabi.
Bago nagsimula ang fashion show ng mga latest underwear designs ng Bench Body, sandali naming nakakuwentuhan ang big boss ng Bench na si Ben Chan.
Sinabi nito na bago pa man ang kontrobersiyang kinasangkutan ni Katrina sa Vicki Belo-Hayden Kho split up ay naka-sign up na sa kanila si Katrina. Na-delay lamang umano ang launching kay Katrina dahil hinintay muna nilang mag-die down ang controversial issue.
Very positive ang pananaw ni Ben Chan na makakabawi si Katrina lalo’t isa na ito sa pinakaba-gong miyembro ng lumalaking Bench Family.
Flattered siyempre si Katrina sa malaking break na ipinagkatiwala sa kanya ng Bench.
* * *
Mabuti naman at nagkaayos na si People’s Champ Manny Pacquiao at ang Solar Entertainment.
Nakuha ang lahat sa magandang usapan matapos gulatin ni Pacquiao ang buong Pilipinas sa kanyang pag-anunsiyo na siya’y balik Kapamilya.
Nawindang ang mga taga-Solar at mga taga-GMA 7 kaya agad lumipad patungong Los Angeles, Cafornia ang Solar Entertainment big boss na si G. Wilson Tieng at COO na si Peter Chanliong para ayusin ang problema at naayos naman dahil naunawaan ng boxing champ na valid at binding ang kanyang pinirmahang kontrata sa Solar Entertainment at ito’y nirerespeto din ng ABS-CBN kahit may pinirmahan ding kontrata sa kanila si Pacman.
Matapos maayos ang gulo, concentrated ngayon si Manny sa kanyang ensayo sa LA para mapaghandaan nang husto ang kanilang paghaharap ng British boxer na si Ricky Hatton sa Las Vegas, Nevada sa darating na Mayo 2 na mapapanood pa rin sa GMA sa umaga ng Mayo 3.
Mananatili ring Kapuso si Manny kung saan siya may dalawang programa, ang Totoy Bato with Robin Padilla at ang Pinoy Records kasama si Chris Tiu kaya tuloy pa rin ang panonood nina Robin at Chris sa laban ni Pacman sa Vegas.
* * *
Walang exclusive contract sa alinmang TV network ang nakababatang kapatid ni John Prats na si Camille kaya puwede siyang magtrabaho either sa GMA o ABS-CBN kung saan siya nagsimula. Lately, mas naging sunud-sunod ang project ni Camille sa Kapuso at malaking bagay sa kanya na muli siyang nakatungtong sa bakuran ng ABS-CBN dahil sa pelikulang T2 na pinagbibidahan ni Maricel Soriano at dinirek ni Chito Roño under Star Cinema.
Bukas si Camille to work with either GMA 7 or ABS-CBN. Basta kung saan may magandang offer, doon siya.
When not busy sa kanyang showbiz work, nakatutok si Camille sa kanyang ipinatayong prep school sa Village East Executive Homes, Cainta, Rizal at siyempre, bilang hands on wife and mom sa kanyang mister at anak.
* * *
Isa nang certified mom si Angelika de la Cruz-Casareo matapos nitong isilang ang first baby nila ng husband niyang si Orion Casareo na si Gabriel nung nakaraang Biyernes (March 20) ng umaga sa UERM Hospital.
Ayon kay Angelika, hindi raw niya maipaliwanag ang pakiramdam ngayong nariyan na si Babby Gabby. In three to four months time ay paghahandaan umano nila ni Orion ang binyag ni Baby Gabby at isusunod naman nila ang kanilang church wedding sa darating na December 4. Kasal na sina Angelika at Orion sa huwes nung isang taon pa bago pa man ihayag sa publiko ni Angelika na siya’y nagdadalang-tao.
* * *
Sayang, Salve A. at hindi kami pumuwede sa paanyaya ni Jun Lalin na bumisita sa set ng Zorro sa Bagac, Bataan. Nakita sana namin kung gaano kaganda ang nasabing lugar na animo’y nasa panahon pa ng mga Kastila. Ganunpaman, masaya ang lahat ng mga involved sa Zorro project dahil worth ang kanilang pagpapagod dahil umabante kaagad ito sa ratings nang ito’y magsimula nung nakaraang Lunes ng gabi, March 23.
Si Richard Gutierrez pa rin talaga ang maituturing ng Primetime King dahil lahat ng kanyang mga TV series ay panalo sa ratings. Siyempre pa, bukod kay Richard at ang ibang cast at ang bumubuo ng production ng Zorro, masayang-masaya ang GMA 7 ganundin ang controversial mom ni Richard na si Annabelle Rama.
* * *
Email: [email protected]
- Latest
