Pacman hakog sa gahom ug salapi?

CEBU, Philippines - Milyones ug suporta sa politika ang giingong rason nganong gilakangan ni Manny Pacquiao ang Solar Sports ug mihukom nga ang ABS-CBN na ang iyang media partner alang sa iyang boxing bouts, sugod sa ilang binokbokay ni Ricky Hatton karong May 2.

Tsika nga nasagap sa Banat Hugyaw, P140M per fight ang gisaad nga ibayad sa Kapamilya network ngadto ni Pacman.

Samtang sa Official Statement sa GMA-7 nga giluwatan kagahapon, gipadayag nila ang ilang labihan nga pagkadismaya sa nahitabo, hinuon giklaro sa Kapuso nga wala silay mahimo niini sanglit wala man silay kontrata tali ni Pacman alang sa media partner para sa iyang mga away.

Ang sitwasyon mao nga ang Solar Sports maoy dunay kontrata ni Pacman ug ang maong outfit maoy mopalit og oras sa usa ka network aron mapasalida ang away sa Pambansang Kamao.

Giklaro hinuon sa GMA-7 nga dunay existing contract si Pacman tali nila para sa telebisyon, diin gumikan niini dili siya mahimo nga mulugwa sa mga shows sa karibal nga istasyon.

Suma pa sa GMA-7 sa ilang statement nga duna silay daghang plano para ni Pacman, lakip na niini ang usa ka sitcom, concerts ug boxing clinics tibuok nasud human sa away nila ni Hatton. Apan tungod sa nahitabo, tun-an na matud pa nila og balik ang ilang kasabutan tali sa banggiitang boksidor.

Ang tipik sa statement sa GMA-7 nagtumbok sa mga migawas nga taho sa milabay mga adlaw nga gihaylo sa ABS-CBN og political support si Pacman, ilabi na sa laraw niini nga magpapili isip kongresista sa Saranggani sunod tuig, diin matud pa kusog kaayo ang Kapamilya sa maong dapit.

Matud sa GMA-7, dili sila makahimo pagtanyag og ingon niini ngadto ni Pacman sanglit dako kining kalapasan sa Omnibus Election Code.

“Section 95 of the code states that ‘no contribution for purposes of partisan political activity shall be made directly or indirectly’ by grantees of franchises such as television networks,” tipik sa pamahayag sa GMA nagkanayon.

Si Pacman dunay duha ka shows sa GMA-7 karon—Totoy Bato ug Pinoy Records.