13,000 milugwa sa PBB, PDA Auditions

CEBU, Philippines - Sama sa gipaabot nagsugwak gyud ang mga tawo nga nanimpad sa audition sa Pinoy Dream Academy, Pinoy Big Brother Season 3 ug Teen Edition kagahapon sa Park Mall, Mandaue City. Tsika pa ni Bonding Andrian nga gabii pa lang niadtong March 14 duna na’y nangabot sa maong dapit aron manimpad ug kagahapon sa alas singko pa lang gibuksan ang gate. “Wa gyud me nag-expect nga ing-ani ka daghan sa mga tawo, ang Cebu maoy pinakadaghan sa nagpa-audition sa province area (gawas sa Manila). Bisan 4,000 lang kay malipay na me ana, pero wa mi magdahom nga daghan gyud diay kaayo, gani gilibutan ang tibouk Park Mall,” tsika pa ni Bonding Adrian, kinsa correspondent sa Banat Hugyaw ug co-host sa Showbiz Patrol sa dyAB 1512 khz.

Samtang gibutyag ni direk Lauren Dyogi nga mangita sila og laing “aura” sa pagpili sa mga tawo nga mosulod sa PBB aron mas mahugyaw pa kini og maayo.

Nag-iyahay sa pagpakita sa ilang mga talento ang mga Sugbuanon kagahapon ug duna pu’y uban nga nagagikan pa sa ubang dapit sa Kabisay-an.

Samtang nagpadayon ang audition, gilingaw usab ang mga tawo sa ABS-CBN talents diin ang main performer mao si Robi Dominggo nga giingong gisiyagitan pag-ayo sa mga dalagang babaye gumikan sa kaambongan niini.

Nakuyapan/ Nag-ilogay

Tungod sa kainit daghan matud pa ang nakuyapan. Duna poy mga naglalis tungod kay nag-ilogay og pwesto sa taas nga linya. Ang 14 anyos nga si Leona Mae Batuto kinsa usa sa mga nanimpad mipahungaw sa iyang kasinatian diri sa Banat Hugyaw. “Alas nuwebe ko nilinya, unya nakasulod nako alas tres na sa hapon, puwerting kapoya kay wa ta’y tarong kaon unya duna pa gyu’y mangilog sa linya,” paambit pa ni Leona Mae. Gibana-bana nga mikabat ngadto sa 13, 000 ang mipatim-aw sa Parkmall, kapin sa 9,000 niini mga taga Cebu samtang ang nahibilin mga dayo nga uban gikan pa sa Luzon, labi na taga Batangas.