Survivor Philippines Season 2: "Harder and Easier"

CEBU, Philippines - “More on strategy.” Kini maoy gipahimug-atan kagahapon ni Survivor Philippines Season 2 host Paolo Bediones sa iyang pagpakighinabi sa national ug local media atol sa usa ka paniudto. Matud niya nga mas gusto nila nga ma-abilidad ang ilang mapili nga castaways diin maghimo kini og mga lakang unsaon nga magpabilin sa isla ug unsaon nga mapalayas ang iyang mga kauban.

Dungan niini, giklaro ni Paolo nga buot nilang makakuha og mga castaways nga dunay talagsaon nga abilidad ug dili susama sa gipakita na sa mga standouts sa Season 1 nga sila si Patani, Marlon ug Nanay Zita.

“We need to get people who have distinct personalities. We need new personalities. Before may tanong bakit walang gay? No one stood out. Bakit hindi dinamihan ang kagaya ni Nanay Zita,” butyag pa ni Paolo ngadto sa press.

Giklaro niya nga dili kinahanglan nga fan gyud sa Survivor o kinahanglan nga nasayod nang daan unsay pamaagi sa maong reality show. Ang importante niya pa mao nga matinud-anon ug natural sa imong ipakita nga mga lihok didto unya sa isla diin magtigi ang castaways sulod gihapon sa 39 days.

Expecting Less

Gibana-bana nga mokabat ngadto sa 10,000 ka mga tawo ang mipa ug mopa-audition sa Survivor Season 2 dinhi sa Sugbo nga nagsugod kagahapon ug mahuman karong adlawa diha sa SM City Cebu.

Pero matud ni Paolo gipaabot na nila nga mas gamay ang mopa-audition karong tuiga tungod kay nakita na sa publiko unsa ka lisud ug unsa katinuod ang mga pagsuway nga maagian sa mga castaways.

“We don’t expect na more than last year ang magpa-audition because people have seen that we mean business,” nagkanayon siya.

Gibutyag pod ni Paolo nga dunay mga dayo nga mipa-audition kagahapon, buot pasabot dili lamang mga taga Sugbo. Suma pa niya dunay mga taga Manila nga nanimpad pod sa audition dinhi sa Sugbo.

“The turnout kanina is very good. Cebu has always been a good harvest,” pasigarbo pa niya.

Nasayran nga mokabat ngadto sa 400 gikan sa tibuok nasud ang mopadayon alang sa national elimination. Gikan niini, pilion ang 70, ug human niini magsugod na ang paghashas aron mapili ang castaways nga hayan 18 o 16 kabuok, depende sa budget.

Kahinumduman sa unang season sa Survivor Philippines, upat ka mga bisaya ang nahimong castaways —Nanay Zita, Patani, Nikki ug Vevherly.

PBB vs. Survivor

Sanglit nasungag ang auditions dinhi sa Sugbo kahagapon——Survivor sa SM ug PDA, PBB sa Parkmall——miingon si Paolo nga gipaabot na nila nga mas daghan gyud ang motunga ngadto sa pikas. Kini tungod kay niya pa, artista search ang gihimo sa pikas ug gidungan pa ang duha ka show—PBB ug PDA. Dinhi subli niyang giklaro nga dili artista ang gipangita sa Survivor Philippines, pero dunay mga castoffs nga makabaton og showbiz career kun makita sa management nga dunay “appeal” sa publiko kining mga tawhana.    

Own Concept/ No Formula

Mapasigarbuhon si Paolo nga gitugtan sila sa Castaway Production, ang tag-iya sa Survivor franchise, nga ilang kaugalingong konsepto ang gamiton para sa Season 2.

Giklaro hinuon niya nga sa ubang nasud gitugot man pod ang pagmugna og kaugalingon konsepto, apan ang ubang franchisee wala mangahas. Sa Survivor Philippines matud pa, nahimuot ang tag-iya sa franchise, gani dunay mga mugna nila nga sundugon pod sa ubang mga nasud sama sa paggamit og “ black pearl” ingon man dagko nga “ sepak takraw balls.”

Dugang pa niya, dunay mga bag-ong twist nga ipaila ug duna poy mga gipakita na sa Season 1 nga ibalik. Niya pa, “we will make things harder and easier.” Harder, tungod kay menosan ang gidaghanon sa production sa staff busa kinahanglan nila nga mag-multi tasking, ug easier tungod kay ila nang nabantayan unsay dili maayong buhaton aron dili mapalpak.

Dungan niini, gipaambit ni Paolo nga nakulbaan gihapon siya bisan og malampuson kaayo ang unang season tungod kay “there is no formula on how to come up with the best reality season.” Tungod niini, bida gyud niya pa ang castaway busa kinahanglang matino gyud kun wala ba kini magpaka-aron ingnon lang, pinaagi sa series of psychological tests.

Sa Hulyo niining tuiga gitakda nga mubukas ang Survivor Philippines Season 2.