E'heads concert, iaalay kay Francis

Nalungkot ako nang malaman ko kahapon ang balita na pumanaw na si Francis Magalona sa Medical City dahil sa sakit na leukemia.

Anim na beses yata kaming nagkasama ni Francis sa Australia kaya nakita at naranasan ko ang kanyang likas na kabaitan.

Alaga ko pa noon si Gabby Concepcion. Si Francis ang nakakasama ni Gabby sa mga shows nito sa Australia .

Alam ni Francis na harbatera ako. Unforgettable sa akin ang US$7 na araw-araw niyang ibinibigay sa akin. Barya lang ang seven dollars pero na-appreciate ko ang pagbibigay ni Francis ng datung sa akin.

* * *

Nang i-announce noon ni Francis na magkakaroon siya ng bone marrow operation, kinabahan ako na baka sandali na lang ang itagal ng kanyang buhay.

Parang nag-déjà vu ako. Kung natatandaan ninyo, leukemia rin ang ikinamatay noon ni Roxanne Abad Santos. Siya ang aktres na naging kapareha ni Gabby sa Miracle of Love.

Naka-schedule noon si Roxanne na magkaroon ng bone marrow transplant pero binawian siya ng buhay bago nangyari ang operasyon.

Nagkasama kami noon ni Roxanne sa shooting ng Miracle of Love sa Europe. Takang-taka ako noon dahil ang tagal-tagal ni Roxanne sa loob ng banyo. Yun pala, nalalagas ang buhok niya at nalaglag ito sa sahig ng banyo kaya naglilinis siya para walang makakita sa kanyang falling hair.

* * *

August 2008 nang malaman ni Francis na may leukemia siya at March 2009 ngayon. Pitong buwan lang ang itinagal ng kanyang buhay. Mas matagal pa ang buhay ni Rudy Fernandez dahil tumagal pa ito ng two years mula nang malaman niya na meron siyang peri-ampullary cancer.

Namatay si Francis sa batang edad na 44 pero malaki ang naging kontribusyon niya sa showbiz.

Naulila ni Francis ang kanyang asawang si Pia Arroyo at ang walong anak nila. Dalawa sa anak ni Francis ang active sa showbiz, sina Maxene at Saab.

Sa huling interbyu kay Maxene, punumpuno siya ng pag-asa na madudugtungan pa ang buhay ng kanyang ama.

* * *

Mamayang gabi ang concert ng The Eraserheads sa concert grounds ng Mall of Asia.

Sure ako na ihahandog ng E’heads kay Francis ang kanilang concert dahil kaibigan nila ang yumaong singer.

Malapit din kay Francis ang vocalist na si Ely Buendia. Nag-record pa nga sila ng album na may title na Sickos dahil pareho silang may sakit.

Wala pa akong balita sa mangyayari sa album na ginawa nina Francis at Ely pero tiyak na magki-click ito kapag available na sa mga record bars.