WIMY P25.5 milyon niadtong Sabado

Gipamatud-an gyud ni Richard Gutierrez nga siya maoy Valentine King tungod kay niadtong Sabado lang mihipos og P25.5M ang pelikula nila ni KC Concepcion nga When I Met You. Sad lang si Richard kay wala gyud sila magka-date ni KC sanglit busy na siya sa iyang taping para sa Zorro nga makita na karong March 9, sa GMA7.

Sister ang nagmugna sa name ni BB

Ang igsuon nila ni Rustom Padilla nga si Rema Padilla Ohno maoy nagmugna sa ngalan nga BB Gandanghari sa iyang igsuon sanglit nilang tanang magsuon sila matud pang duha maoy suod kaayo.Suma pa niya nga pagkakita niya ni BB sa TV pag-abot niini gikan sa New York, wala na siya makugang tungod kay sayod na siya nga mao kini plano sa controversial celebrity.

Wow Mali mubalik

Human sa duha ka tuig, mubalik na sa TV 5 ang sikat nga gag show, Wow Mali ni Joey de Leon nga matud pa duna nay bag-ong concept ug mas alegre na. Magsugod kini karong February 22, 6pm, isip hulip sa You & Me Against The World ni Gretchen Barreto nga nag-season finale na niadtong Domingo.

Buhat ni Dingdong di kaya ni Dennis

Dili pa andam si Dennis Trillo nga musunod sa mga tunob ni Dingdong Dantes nga nagpa-sexy sa pictorial niini para sa Cosmopolitan magazine ug alang sa Bench tungod kay dili pa siya nindot gyud og lawas. Pero kung dunay mo-offer niya nga underwear brand para iyang iduso, dili siya magduha-duha basta nindot ang konsepto.

Lovi ug Jolo sa balay nag-date

Sa balay nila sa Alabang nagsaulog sa Valentines Day si Jolo Revilla kauban ang iyang pamilya. Giangkon niya nga didto sa ilang balay si Lovi Poe ug mao natoy ilang espesyal nga date.

BB suportado ni Robin

One hundred percent nga nadawat ug suportado ni Robin Padilla si BB Gandanghari sa bag-ong kinabuhi niini. Matud ni Robin basta malipayon ug walay napasakitan ang iyang igsuon, walay problema. Pero og magkita sila, “Tol” ang iyang itawag kang BB.

Pagbalik sa “Vagina”

Subling mubalik sa Sugbo ang sikat kaayo sa tibuok kalibutan nga “Vagina Monologues. Limitado ug usa ka gabii ra kini nga ipakita diha sa Onstage! Ayala Center Cebu Cinema 1 karong Sabado , February 28, 2009 at 7:00 PM. Mga sikat ug banggiitang theater personalities sa Sugbo ang muhatag og kinabuhi sa nagkadaiyang istorya sa vagina.

Ang Vagina Monologues, namugna niadtong 1996 ug subling gibuksan niadtong October 3, 1999 didto sa Westside Theatre nga gipanguluhan ni Eve Ensler. Nakadapit kini og pagtagad sa daghang mga tawo tibuok kalibutan ug nakapalig-on ingon man nakapalapad og maayo sa kampanya batok sa pagpanamas-tamas sa kababayn-an.

Kataw-anan, kulbahinam ug puno sa pagtulun-an ang maong mugna hinungdan nga kanunay na nga giatngan ang paglugwa sa Vagina Monologues.

Niadtong Valentine’s Day 2001, diin sold out kini sa Madison Square Garden, si Eve Ensler giubanan sa mga sikat nga bituon sama nila ni Oprah Winfrey, Jane Fonda, Glenn Close, Calista Flockhart, Marisa Tomei, Rosie Perez, Terri Hatcher, Lisa Gay Hamilton, Queen Latifah ug Amy Irving.

Dinhi sa Sugbo karong February 28, pipila sa muhatag og kinabuhi sila si Rycky Pilapil, Orly Cajegas, Rhea Fantonial -Bautista, Micole Ybanez, Jarealise Mauro, Cheri Lou Mendoza ug Vanessa Amman. Gisuportahan kini sa Dramatist Play Service, Inc., diin ang tickets nagkantidad og P500 (Limited VIP Reserved Seating), P300 (Prime Seating), ug P200 (General Seating.) Mapalit ang tickets diha sa Coffee Dream Ayala – near Cinemas; Gifts Unlimited (Ayala Center Cebu 2nd Level across Globelines 231-5587) ug Opononline.com & Mandaueonline.com (340-9054 / 09203287542 / 09195716458)