Janna tak-om kay hadlok makamulta

Gipaatubang na sa press kagahapon ang nahabiling upat ka partisipantes nga gitawag nga Fearless Four uban sa tulo ka katapusang na-eliminate nga gilangkoban nila ni Savanah, RJ ug LJ Moreno sanglit katapusang semana na lang karon sa “Pinoy Fear Factor: Argentina, South America.

Sila si Manuel “Supermanuel”  Chua, Jommy “Scorpion King” Teotico, Janna “Bonana” Dominguez ug Marion “Kryptonite” dela Cruz ang magtigi karong semanaha aron malangkat ang titulo nga El Ultimo Participante nga ipahibawo karong Biyernes.

Dugay na nga nahuman ang shooting sa maong reality show sa Argentina ug ang gitag-an sa press nga modaog mao si Janna sanglit lahi ang aura niini sa tulo.

Adunay mibuthong tsismis matud pa nga nakainom ang manager ni Janna ug mibutyag kini nga ang iyang alaga ang nakadaog. Makausa naligas pod ang dila ni Cristine Reyes nga nakauban ni Janna sa Eva Fonda dihang mikantiyaw kini og blow-out kaniya.

Apan tak-om gyud ang baba ni Janna kung pangutan-on kini kinsa ang midaog sanglit aduna silay gipirmahang agreement nga dili ibutyag kang bisan kinsa ang pangalan sa nakadaog hangtod dili pa kini mahuman sa telebisyon ug gawas niini, momulta pod og 5M ang dili motuman sa maong sabot

“Kahit nga po sa family ko, hindi ko sinasabi kasi ayoko pong magmulta,” asoy ni Janna.

Giklaro pod ni Janna nga dili tinuod nga nakahibawo ang iyang manager sa nakadaog.

Sa wala pa molupad padung sa Amerika si Janna, na-link na kini nila ni Baron Geisler ug sa composer nga si Lito Camo ug sa pagbalik niini na-tsismis pod sa mga kauban niyang partisipantes nga sila si Manuel ug Marion. Gitino sa aktres nga wala sa mga nahisgutan ang nagpakulba sa iyang dughan tungod kay si Jose matud pa ang iyang special someone. Padung pa lang sila sa Argentina nagka-crush na siya kang Jose apan wala mahatagi og chance nga magkaduol sila ug dinhi na sila sa Pilipinas mas nahimong closer.

Sa laing bahin, mibutyag si Janna nga kung siya ang nakadaog sa 2M (madag-ang cash price sa El Ultimo Participante), ipadayon niya ang iyang pagtungha ug papulion niya ang amahan nga nagtrabaho sa Japan.

LJ tubig ang gikahadlokan

Wala makaya ni LJ ang underwater stunt, ang katapusang challenge nga nahimo niya sa Pinoy Fear Factor sanglit nahutdan siya sa hangin ug hadlok matud pa siya sa tubig. Kini matud pa ang labing lisod nga stunt ug ang pagkaon sa 20 kabuok nga ok-ok alang kaniya.

Half-breed matud pa ang mga ok-ok, Madagaspar ug ok-ok sa balay.

“Parang malansa lang siya ang feeling gross siyempre. Pero feeling lang ang gross. ‘Yung lasa naman, not as gross naman,” butyag niya.

Sa laing bahin, si Jommy gitawag og Scorpion King tungod sa pagkaon niya sa scorpion hinungdan nga gipaak ang iyang ngabil ug kini mihubag.

Totoy gibaaBot nga mubuto sa ratings

Usa ka certified blockbuster ang “Totoy Bato” niadto ni FPJ ug tataw matud pa nga toprating kini karon sa drama series nga gibidahan ni Robin Padilla uban nila ni Regine Velasquez, Eddie Garcia ug Manny Pacquiao nga magsugod na karong Lunes, Pebrero 23.

Sa miaging tuig, nagkauban sila si Robin ug Eddie sa “Joaquin Bordado”. Nahimong finalist ang show sa Action/Adventure category sa New York Festival ug niining bag-ong drama series mas kulbahinam sa action ug suspense ang mga eksena nila ni Binoe ug sa multi-awarded actor.

Si Regine Velasquez ang modala isip Anna, ang love interest ni Totoy Bato apan adunay kapikas sa atensyon si Regine, si Sweet Ramos isip Cecilia, ang nag-inusarang anak ni Totoy Bato.

Ang ubang mga cast gilangkoban nila ni Ian Veneracion, ang kontrabidang si Miguel, usa ka GRO nga mangdani kang Totoy si Ehra Madrigal, Caridad Sanchez, Jonee Gamboa, LJ Reyes, Rommel Padilla, Mon Confiado ug Queenie Padilla, modala isip usa sa mga kaaway ni Totoy Bato. Adunay special role si Ara Mina isip ill-fated wife ni Totoy Bato.

Gikan sa komiks, nahimong pelikula ug karon usa na ka teleserye ang Totoy Bato nga gi-direct nila ni Mac Alejandre ug Don Michel Perez. Aduna pod kini theme song nga giulohan og “Ako’y Sayo” nga gi-compose ni Ogie Alcasid ug giawit ni Regine Velasquez.

 “Very inspiring ang kwento ng buhay ni Totoy Bato,” butyag ni Robin Padilla. “Isa itong kasaysayan na lahat ng Pinoy makaka-relate.”

Dako ang pasalamat ni Binoe sa dagko ug lahing mga proyekto nga gihatag sa GMA kaniya hinungdan nga padayon siyang kapuso. (Erveliza B. Colipapa, UV Journalism Intern)