Juday at Ryan walang honeymoon

Kung si Ryan Agoncillo ay open sa pagkukuwento sa bibilhing bahay nila ni Judy Ann Santos, gaya kung saan ito, kung ilang kuwarto meron ang bahay at kung anong kuwarto ang napili ng anak nilang si Yohan, ang actress ay ayaw munang magsalita.

Hihintayin daw nilang makapag-down payment sila at saka na siya magkukuwento ng husto sa bahay, pero kita sa mga mata nito ang excitement.

Nagbigay na rin siya ng clue kung kailan sila ikakasal ni Ryan. “Kundi April ay May,” ang sagot nito. Hindi sila makakapagbigay ng definite date hangga’t wala pa silang bahay na uuwian after their wedding.

Sa interview sa kanya sa Showbiz Central, sinabi nitong priority nila ang makabili ng bahay at depende sa cash na hawak nila at pambili ng bahay ang kanilang kasal. Wala ngang honeymoon sina Judy Ann at Ryan dahil ang gagastusin sa honeymoon ay idadagdag na lang sa budget nila sa bahay.

* * *

Totoo ba ang tsikang bago ma-link kay Marvin Agustin, nag-date muna sina Krissa Mae at Aljur Abrenica? Bago nga raw ilabas ng aktor ang Fil-Am beauty, tinawagan nito si Polo Ravales para alamin kung may masisira siyang relasyon kung lalabas sila ng dalaga. Saka pa lang natuloy ang date ng dalawa.

Hindi kaya si Kris Bernal na official loveteam ni Aljur naman ang magalit kay Krissa Mae sa nabuking na pagdi-date nila ni Aljur? Pero minsan lang daw ’yon at hindi na nasundan.

May tsika pang nakita si Kiko Austria ng Survivor Philippines ang ka-date naman ni Krissa Mae. Sana lang, hindi maakusahang playgirl si Krissa Mae na napapanood sa Gagambino bilang ka-loveteam ni Benjie Paras.

* * *

Hindi nag-comment si Isabel Oli kung ang isinoli niyang 3-karat ring sa ex niyang si Paolo Contis ang same ring na ibinigay nito bilang engagement ring kay Lian Paz. Unfair daw mag-comment dahil hindi niya napanood ang guesting nina Paolo at Lian at kung saan, ipinakita ni Lian sa mga viewers ang singsing, pero marami ang nagsasabing it is the same ring.

Nakakapagtaka rin ang reaction ni Paolo, itinanggi ang isinoling singsing ni Isabel ang ibinigay kay Lian, pero ipinao-off the record, bakit kaya?

Samantala, sa February 8 na ang pilot ng My Dad is Better Than Your Dad na host si Paolo at ito ang papalit sa Family Feud: Celebrity Edition.

Nahahati ang game sa apat na rounds, ang Ang Daddy Kong Fast, Ang Daddy Kong Strong, Ang Daddy Kong Smart, Ang Daddy Kong Brave. Ang mag-amang mananalo sa four rounds ang papasok sa jackpot round na tinawag na Ang Daddy Kong Da Best at may chance manalo ng P100,000.

* * *

Sa Luna Mystika, sasabihin ni Ybarra (Ariel Rivera) kay Luna (Heart Evangelista) na kaya niya ito susunugin, bilang paghihiganti sa pamilya Sagrado na umapi sa kanya. Maririnig ni Diana (Rita Avila) sa kanyang panaginip na may anak siyang humihingi ng tulong. Maililigtas ni Joaquin (Dante Rivero) si Luna.

Makakarating sa perya si Karya (John Lapus) at mapapakawalan si Libado (Aljur Abrenica). Malalaman ni Dexter na engkanto si Luna at madidiskubre rin ni Ybarra na anak niya si Luna.