"It was not an honest mistake"-Burden

Dili na gyud mobalik pa si Kimberley Therese Burden isip 2nd runner-up sa Miss Cebu 2009. Kini maoy gitataw sa iyang pamilya kagahapon pinaagi sa usa ka press conference nga gipahigayon diha sa Grand Convention Center kagahapon sa udto.

Ang maong hukom, matud pa desisyon sa tibuok pamilya human usab nila makita nga labihan ka apektado si Kim sa nahitabo.

Kahinumduman nga atol sa pageant niadtong Huwebes, Enero 14, nga nasayop ang pagpahibawo kinsay midaog isip Globe Texter’s Choice Award, sa labing prestihiyoso nga indigay sa kaanyag sa lalawigan sa Sugbo. Unang gipahibawo nga si Miss Cebu 2009 Kris Janson ang midaog sa maong award, apan wala magdugay gibakwi kini pinaagi sa pag-ingon nga dunay second winner nga mao si Kim.

Si Bruce Bollozos, kansang consultancy firm maoy gikuha sa Commission alang sa live airing sa maong pageant sa Studio 23 nagkanayon nga “honest mistake” ang nahitabo sanglit naliban siya tali sa ngalan nga “Kris” ug Kim.

Pero ang pamilya Burden karon dili kumbinsido nga “honest mistake” ang nahitabo. Kini tungod kay matud pa walay tukmang lakang nga gibuhat ang Commission aron pagtul-id sa kasaypanan.

“Host David Celdran announced that there was a second winner for the texter’s choice because of last minute text votes. There was never any mention of an Honest Mistake. Kim moved forward, was ignored and had to go back to her place,” butyag pa sa Official Statement sa pamilya Burden.

“If someone from the commission went up to the stage and claimed their honest mistake and announced it before the crowd. Wala na ta’y problema. But they did not do anything to rectify it, there was no honest mistake mentioned, instead they proclaimed that there is a second winner,” tumbok pa ni Dr. Rowena Burden, inahan ni Kim.

Samtang midugang ang legal guardian ni Kim nga si Marilu Burden nga, “She (Kim) know that she was humiliated in a big crowd. We have been witnesses to how hard she has been affected by this ordeal. The sight of her breaking down in tears every time she gets a text message or phone call from someone declaring for her support forever be etched in our memory. Kim strove hard and played fair to be Miss Cebu but this award meant more to her than crown”, puno pa ni Marilu Burden.

Dinhi na gipaambitan ni Dr. Burden nga nagkanayon si Kim nga dili na siya mopadayon   isip 2nd runner-up. “How could I go back when I will see the same people who had humiliated me?!,”nagkanayon matud pa si Kim. 

Dugang pa niya nga miduso na sila og formal letter ngadto sa CCTC aron mangayo og kopya sa video coverage apan hangtud karon wala pa silay nadawat nga tubag hangtud sa pagsuwat niining balita kagahapon.

Suma pa ni Dr. Burden maluoy kaayo siya sa iyang anak tungod kay magsige na lang og hilak hangtud sa iyang pagkatulog. Apektado na niya pa ang pagtuon ug scholastic activities sa iyang anak tungod sa insidente. Nasayran nga dunay midterm examinations si Kim nga sagubangon ug siya pod ang pambato sa Cebu Doctor’s University sa usa ka extemporaneous speech competition karong semanaha.

“The “honest mistake” brought Kimberley Therese Burden extreme pain and suffering. The damage has been done; she has been broken and will never be whole again”, panapos ni Burden.

Samtang si Philip Rodriguez, Project Director sa Miss Cebu nagkanayon kagahapon nga ang texter’s choice award independent ug walay bearing sa tally sa mga judges sa pagkuha sa korona o sa pagkalakip sa top five positions.  

Nagpaabot ang Banat Hugyaw sa Official Statement sa Commission, apan wala pa kini miabot pasado alas siete kagabii.