KC ug Richard "best in holding hands"

Naghinam-hinam na kaayo ang mga fans sa kapamilya ug kapuso sa umaabot nga pelikula nila ni Richard Gutierrez ug KC Concepcion nga nag-ulohan og “When I Met You.”

Matud pa ni Mother Lily Monteverde nga masaligon siya nga mokita gayud sa takilya ang maong movie diin molugwa na kini karong Febuary 11, 2009 isip Valentine movie presentation sa GMA Films ug Regal Entertainment.

Atol sa presscon dinhi sa Sugbo kagahapong adlawa, gipadayag nila ni KC ug Richard nga na-enjoy sila sa paghimo sa maong peilkula diin pipila sa mga importante nga eksena niini gimugna didto sa Coron, Palawan.

“Masayang kasama si Richard, mas sweet kaming dalawa off cam, hehe,” matud pa ni KC ngadto sa mga sakop Cebu Entertainment Group (E-Group).

Kumportable ang duha sa ilang mga karakter diin modala nga piloto si Richard sa movie samtang promo girl usab si KC.

“Maganda ang mga eksena sa movie at talagang mabubusog ang mga viewers,” matud pa ni Richard.

Samtang gipadayag sa inahan ni Richard nga si Anabelle Rama nga angay lang nga tan-awon ang movie sa iyang anak ug ni KC kay seguradong malingaw ug makilig gyud ang motan-aw niini.

“Mga Cebuano, nindot gyud ang pelikula, dili gyud mo magbasol sa inyong ibayad,” dalikyat pa ni Anabelle kalabot sa pelikula nga ubos sa direksyon ni Joel Lamangan.

Human sa presscon nga gipahigayon diha sa Pino Restaurant, mitekang dayon ang duha sa ilang float alang sa Sinulog parade.

Nabantayan nga “sweet” gyud sa usag-usa sila si KC ug Chard nga matag karon og unya, mag-holding hands. (Sanden J. Anadia)