Pops mihilak kay wala pakpaki

Adunay mga hungihong nga matud pa wala mapugngi ni Pops Fernandez ang mupatulo sa iyang mga luha sanglit wala siya hatagi og masipang pakpak sa mga mitan-aw sa Divas 4 Divas Concert sa Waterfront Hotel dinhi sa Sugbo.

Tsika nga nasagap sa PangMasa nga sa dihang milugwa na sila si Kuh Ledesma ug Zsa Zsa Padilla, mainiton kaayo ang pagdawat niini sa mga Cebuano, apan sa dihang migawas na si Pops nawad-an og gana ang mga mananan-aw. Matud pa nga sa pagkanta sa concert queen, mipahawa ang ubang mananan-aw aron musulod sa bathroom, ug ang uban nanigarilyo lang sa atubangan ni Pops.

Dungag pa nga ang rasun sa maong insidente mao ang higayon nga gi-imbitar si Pops sa usa sa mga dagkong tawo dinhi sa dakbayan, wala kini mahatagi og maayo nga resulta ug dili maayo ang pakighinabi niini sa mga organizer. Na-offend matud pa ang maong tawo ug gipanabi kini sa iyang mga kaila ang giingong gibuhat ni Pops ug sa mga alipores niini. Padayon pa nga gipaabot sa E-press ang official statement ni Pops. (Darling Chyrmyth Wagas, UV Journalism Intern)