Alfred mag-politiko

Nagdahunog na ang tsika nga molansar karong 2010 si Alfred Vargas nga piniliay. Adto matud pa siya sa Bulacan magpapili, pero wala pa matino unsa nga posisyon ang iyang daganan. Ang tsika lang mao nga kanunay na nga makit-an si Alfred nga kauban sa mga inilang politico sa nahisgutang dapit. Kini matud pa ang rason nganong dili kaayo visible si Alfred sa showbiz karong panahona.

Hayden wapa kagawas sa hospital

Okay ug moving forward na matud pa si Dra. Vicki Belo human sa ilang panagbuwag ni Dr. Hayden Kho. Tsika nga walay nahimo nga istorya ang nagkadaiyang showbiz talk shows kalabot sa break-up tungod kay walay nasayod hain karon si Hayden mahimutang samtang nagdumili si Belo nga ma-interview karong panahona. Pero kagahapon sa Startalk, naligas ang dila sa beteranang kolumnista sa PangMasa ug usa sa mga hosts sa maong programa, manay Lolit Solis, tungod kay gibutyag niini nga naa ra sa usa ka hospital na-confine ang gwapo nga doctor karong panahona. Nabalita pod sa maong talk show nga plano una ni Hayden nga mopauli ngadto sa iyang inahan sa Marinduque. Nasayran nga migawas ang tsika nga misuway og hunos sa iyang kinabuhi ang doctor tungod sa mga isyu ug sa ilang panagbuwag mismo ni Belo. Pero ang mga nagpalibot ni Hayden miingon nga stress out lang ang rason sa pagka ospital niini.

Katrina nangangkon nga ok sila ni Belo

Mitekang kagahapon sa Startalk si Katrina Halili, ang usa sa duha matud pa ka mga Kapuso talents nga iring-iring ni Dr. Hayden Kho. Ang laing usa mao si Rufa Mae Quinto, kinsa nakugang nganong nalambigit siya sa break-up sa duha ka mga doctor kansang relasyon milungtad og tulo ka tuig. Kagahapon si Katrina miingon nga no-comment na siya sa isyu tungod kay nagkasulti na sila ni Dr. Vicki Belo, diin usa siya sa mga endorsers, ug niya pa okay sila busa dili na haom nga muluwat siya og pamahayag. Ang intriga mao nga dunay sex video sila si Katrina ug Hayden, mao pod si Rufa Mae ug ang doctor. Ang maong video matud pa maoy nakapalig-on sa hukom ni Belo nga magbuwag na gyud sila ni Hayden.