Team up ni Kristine ug Rafael ipadayon sa Maruja

Ang bisdak nga si Rafael Rosell diay maoy leading man ni Kristine Hermosa sa umaabot nga teleserye sa ABS-CBN nga sugdan sunod tuig, ang Maruja. Kini maoy nasayran sa pipila ka sakop sa Cebu Entertainment Group nga gikasawo ni Rafael og lamiang paniudto diha sa Lighthouse Restaurant sa Mango Avenue kagahapon. Si Raf maoy celebrity guest sa first draw sa A Million Thanks Raffle Promo sa Gaisano Incorporated, diin gikagubtan siya og maayo sa iyang mga fans diha sa Gaisano Main ug Countrymall kagabii.

Asoy pa ni Raf, sa January 5 ang ilang first taping day ni Kristine. Nasayran usab gikan sa road manager ni Raf nga ang “Maruja” napanlantawan nga maoy ihulip sa time slot nga mabakante human og pasalida sa mga pelikula kanhi ni anhing Rudy Fernandez matag Biyernes sa gabii. Meaning, kausa ra sa usa ka semana makita ang maong teleserye.

Ang anak sa Daanbantayan nga si Raf mitug-an nga himuan nila og kaugalingong version ang maong obra ni Carlo J. Caparas nga gihimong pelikula nila ni Carmina Villaroel ug sa kanhi bana niini nga si Rustom Padilla. “It’s our own interpretation, kaya di ko papanoorin yung movie,” ni Raf pa.

Niya pa padayon pang gikompleto ang cast sa Maruja, pero sa iyang nasayran apil pod niini sila si Karylle, John Estrada ug Ms. Gloria Romero, ubos sa direksyon ni Jerome Pobocan. Kahinumduman nga unang nasud-ong sa publiko ang chemistry ni Raf ug Tintin sa teleserye nga ‘Prinsesa ng Banyera”

Samtang gibutyag pod ni Raf nga motekang ang Coverboys dinhi sa Sugbu karong January 16, isip guest sa show nila ni Pokwang ug Pooh. Gawas ni Raf, apil sa pioneer batch sa Coverboys sila si Jake Cuenca, Will Devaugh, Jon Avila ug Zanjoe Marudo.