Ann Curtis ug Sam Milby nagkauli na ang relasyon

Human ang daghang mga hungihong sa tinoud nga relasyon nila ni Sam Milby ug Ann Curtis, gi-asoy sa FilAm aktor nga nagka-istorya na sila sa dalaga niadtong Martes, sa gipahigayon nga Trade Lunch sa ABS-CBN ug dihang gipangutana kini sa iyang deskripsyon sa ilang panag-istorya nagkanayon kini nga, “it was a good talk”.

Giklaro sa aktor nga bisan pa og maayo na ang ilang relasyon ni Anne isip managhigala wala magpasabot nga nagka-uli na sila. Dungag niya nga labing maayo kong atangan nalang kini sa kadaghanan sa umaabot nga mga adlaw.

Sa laing bahin, gipanghambog usab ni Sam ang iyang bag-o nga pelikula ubos sa Star Cinema uban si Bea Alonso nga gisugdan niadtong Huwebes apan iyang gibutyag nga wala pa sila magka-eksena sa batan-ong aktres.

Ang konsepto sa maong pelikula adunay bug-at nga drama nga ipagawas sa umaabot nga tuig human malangan ang una unta nga ipagawas nga pelikula nila Piolo Pascual ug Angel Locsin nga gi-ulohan og Land Down Under.

Ang aktor ang magsugod usab sa paghimo sa ilang umaabot nga teleserye ni Angel Locsin human sa telefantasyang “Dyosa” karong Pebrero.

* * *

Gerald Anderson Naningkamot

Padayon gihapon ang acting workshop ni Gerald Anderson tungod kay gusto niyang mapaayo pa gyud ang iyang talento sa pag-arte bisan pa sa daghang nakuha niining maayo nga mga komentaryo nga dako ang iyang improvement sa ilang serye ni Kim Chiu nga mao ang “Your Song Presents My Only Hope” nga makit-an matag Domingo.

Matud sa aktor nga dako ang iyang kalipay nga gitunol ngadto sa iyang mga dumadayeg ug dili gayud siya mohunong hangtud dili niya mabaid pag-ayo ang iyang talento.

Sa pagkakaron gipadayon ni Gerald ang iyang workshop ubos sa direksyon ni Laurice Guillen alang sa ilang umaabot nga serye ni Kim nga gi-ulohan og “Tayong Dalawa”. 

Ang maong serye ang usa sa labing unang ipagawas karong Enero, diin usa ka sundalo ang iyang barogan nga role nga matud sa aktor duol sa iyang kasing-kasing tungod kay usa man ka US Naval Officer ang iyang tinuod nga amahan.