Regine nakighawok og model

Dili matud pa angay mangabubho si Regine Velasquez sa partner ni Ogie Alcasid —sa music video niini para sa kantang Kung Sakali—nga si Brazilian model Daiana Meneses. Kini tungod kay puros ra mga nawong ang gipakita sa ilang mga eksena ni Ogie. Pero matud pa nga angay nga mangabubho si Ogie sa partner pod ni Regine nga si Japanese/Brazilian model Akihiro Sato, para sa music video niini sa Tell Me That You Love Me (first single sa bag-ong Low Key album). Kini matud pa dunay kissing scenes ang duruha nga angay gyud pangabubhuan. Gani naglibog ang mga himantayon giunsa pagpatando si Regine sa maong mga eksena.

Himala nanghawod sa Asia-Pacific

Naintriga ang mga himantayon sa Manila tungod sa gipakatap nga text messages sa mga Noranians nga nagkanayon nga midaog ang pelikulang Himala sa ilang idolo sa Asia-Pacific Film Awards. Naglibog lang ang mga himantayon nganong walay balita nga migawas kalabot niini nga dako man kini nga award ug ang CNN pa gyud ang nagpasiugda niini. Dunay mga maglisud pagtuo giunsa niini pagpildi ang Crouching Tiger, Hidden Dragon ni Ang Lee ug daghan pang   deserving winners sa mga finalists. Pero duna poy miingon nga hayan nagkugi lang gyud og boto ang mga Noranians maong midaog ang Himala, directed by Ishmael Bernal.

Finale sa Asero kulbahinam

Mahuman na ang Codename: Asero karong gabii ug daghan matud pa nga sorpresa nga angay atangan sa finale niini nga milungtad og hapit duha ka adlaw ang paghimo. Live nga i-introduce ni Richard Guttierez ang finale scenes, dayon ipakita na kini. Human niini mahitabo ang dako nga party sa Studio 5 sa GMA Network Center, diin manambong ang tanang cast.

Docu labot sa usab-usab nga klima, isalida

Dunay gi-produce nga documentary si Senator Loren Legarda nga giulohan og Ulan sa Tag-Araw: Isang Dokumentaryo Ukol sa Pagbabago ng Klima, diin sila si Chin-Chin Gutierrez ug Roy Alvarez nga puros mga environmentalists ang muhatag og kinabuhi niini. Una kining isalida ugmang adlawa, November 14, sa Cinema 1 sa Shangri-La Cineplex sa Mandaluyong City sa 10:30 a.m.

Uyab ni Rufa Mae makigbalik

Buot matud pa makigbalik ni Rufa Mae Quinto ang iyang Hongkong-based businessman boyfriend nga si Bobby Lopez. Pero matud ni Rufa Mae ngadto sa PangMasa unya ra niya kini atubangon tungod kay busy pa siya sa construction sa iyang bag-ong balay sa Corinthian Hills sa Quezon City.

Heart maguwang kaayo ang uyab

Giangkon ni Heart Evangelista nga duna na siya’y uyab, si Francisco Delgado kansang pamilya nanag-iya og mga barko. Thirty four years old na ang lalake ug 23 years old pa lang si Heart, pero niya pa mas ganahan siya sa maong set-up. Giklaro ni Heart nga dugay nang amiga sa iyang inahan ang mao niyang boyfriend. Pero dihang gipangutana kung nahisgutan na ba nila ang kasal, matud ni Heart nga seryoso ra kaayo kana nga hisgutanan sanglit upat ngadto sa lima ka buwan pa lang ang ilang relasyon. Matud ni Heart naghuna-huna pa lang siya og maayo kung pang-forever na ba gyud ang iyang relasyon. Gawas pa, priority niya ang iyang career ilabi na nga nakabaton siya og second chance sa showbiz human niya gibaylo ang tanan alang sa gugma ni Jericho Rosales kaniadto. Si Heart ang bida sa umaabot nga primetime show, Luna Mystika.

Nikki ug Billy perteng hawkanay?

Gihimakak ni Nikki Gil ang balita nga nakit-an silang naghawkanay ni Billy Crawford sa Tagaytay niining bag-o lang. Matud pa niya tinuod nga nag-date sila, pero nungka nga naghawkanay sila sukwahi sa migawas nga taho nga daw walay laing tawo sa palibot ang pamati nilang duha samtang nagtakdo ang ilang mga ngabil. Matud ni Nikki nga dili pa sila uyab ni Billy pero labaw pod sila sa managhigala. Getting- to- know- each-other ang ilang estado, pero nakadayeg siya og maayo   sa international artist tungod kay niya pa, down-to-earth kaayo kini.