Miss Labangon 2008: When a first timer wins the crown

Ang maanyag ug utokan nga dalaga nga si Stephanie maoy nakaangkon sa korona sa Ms. Labangon 2008 nga gipahigayon dili pa lang dugay diin iyang gikatigi ang laing 15 ka mga maanyag nga babaye niadtong higayona.

Ang 15 anyos nga rayna sa Barangay Labangon mipaambit dinhi sa Banat Hugyaw nga grabe gyud ang gibate niya nga kakulba sa pagsalmot sa nahisgutang beauty contest sanglit first time niya ang maong pageant busa wala siya magdahom nga maangkon ang korona sa tinuig nga Ms. Labangon.

Si Stephanie mipadayag nga andam na siya mosalmot sa mga laing beauty contest aron mas mapasigarbo pa siya og maayo sa iyang pamilya ug sa iyang mga higala. Butyag usab niya nga pinaagi sa pagsalmot sa mga indigay sa kaanyag mapakita niya ang iyang talento ngadto sa mga tawo.

Pangandoy ni Stephanie nga mamahimong businesswoman ugma damlag.

“Ganahan gyud ko mahimo nga businesswoman, one thing nga akong gitan-aw, kay gusto usab nako nga ma-promote ang mga products sa Philippines didto sa laing country,” pag-angkon pa sa rayna sa barangay Labangon dinhi sa Banat Hugyaw. 

Si Stephanie gihulagway sa iyang mga higala nga charming ug boutan kay mahigalaon man kini, ug labaw sa tanan dili kini arte nga pagkababaye.

Samtang sa laing bahin, gihulagway ni Renato Alburo, ang over-all coordinator sa maong pageant nga nagmalampuson ug hugyaw karon ang Miss Labangon 2008 ug iyang gipasalig nga sa sunod tuig pun-an pa ang kahugyaw niini. Ang kalampusan sa nahisgutan nga pageant naggumikan usab sa tiunay nga suporta sa Labangon Barangay Council pinanguluhan ni Kapitan Felix Abella, dinuyugan sa iyang mga konsehales.