Nagtiis sa hirap para sa datung, bahay at lupa

Labindalawang participantes ang susubok sa kanilang tapang at mga sarili pero sa bandang huli, isa lang sa kanila ang tatanghaling El Ultimo Partici­pante sa Pinoy Fear Factor - Argentina, South America na magsisimula nang mapanood sa darating na Lunes. Papalitan nito ang Iisa Pa Lamang na magtata­pos ngayong gabi.

Grabe ang mga naiibang hamon at makapigil hiningang mga eksena ng pitong lalaki at limang babaeng kalahok na nangahas harapin ang kanilang mga takot sa loob ng mahigit isang buwan sa malayo at malamig na lugar ng Buenos Aires, Argentina at upang mauwi ang premyong dalawang milyong piso at isang bahay at lupa.

“Lahat ito ay para sa pamilya ko lalo na sa dalawang anak ko. Di man ako nakatapos ng pag-aaral ay ipinangako ko na talaga sa sarili ko na gagawin kong lahat para buhayin ang pamilya ko,” sabi ng machong participante at kargador na si RJ Calipus ng Tondo, Manila.

Bagamat iba’t iba ang estado at kuwento sa buhay, nagkakaisa naman ang participantes na isa-isang ipinakilala sa TV Patrol World sa hinahangad na tagumpay. “Gusto kong ipakita na tulad din ako ng ibang ordinaryong mga tao. Marami akong kayang gawin na hindi aakalain ng mga nakakapanood sa akin sa TV na kaya ko palang gawin,” sabi ni TV Patrol World anchor at partici­pante na si Phoemela Barranda.

Para naman sa seksing ledge dancer na si Savanah Lamsen, ang PFF ang kanyang magiging daan para maka­pasok sa showbiz samantalang pagbangon naman ng kanyang negosyo ang hangad ng struggling businessman na si Manuel Chua Jr.

Kasama rin bilang participantes ang vete­rinarian na si Elmer Felix, Bikini Summit ’07 winner na si Gail Nicolas, stand up come­dienne na si Janna Dominguez, model na si Jommy Teotico, aspiring chef na si Jose Sarasola, balikbayan na si Marion dela Cruz, ex-basketball player na si Ram Sagad, at dating teen star na ngayo’y pre-school teacher na si LJ Moreno.

Tiyak mamamangha kayo sa sinabak ng do­seng participantes makamit lamang ang titulo na El Ultimo Participant ng Pinoy Fear Factor.

Magkakaroon ng primer sa Linggo (Dec 9) pagkatapos ng Rated K.

Bukod sa mga nakaka-excite na challenges, siguradong magpi-piyesta rin ang mga mata ng manonood dahil mga seksi at papable ang kasali rito. (SVA)