Sea Princess at Wellness Guru nasa show ni RR

Tiyak na maaaliw kayo sa mapapanood na episode ng Lifestyle With Ricky Reyes sa QTV-11 alas-diyes hanggang alas-onse ngayong Linggo.

Makakatsikahan ng host na si Mother Ricky ang dalawang babae na magkaiba ang lifestyle pero kapwa popular sa kani-kanilang propesyon at masaya ang outlook sa buhay.

Sila’y ang health buff at tinaguriang ‘Wellness Guru’ na si Cory Quirino at ang ‘Sea Princess’’ na kikay na interior decorator at first champion ng Celebrity Duet na si Tessa Prieto-Valdes.

Malalaman kung bakit kahit ty-5 na ang edad ni Cory ay slender pa rin ang katawan, makinis ang kutis at masigla pa rin siya.

Isisiwalat naman ni Tessa kung bakit wala siyang paki kahit tawagin pa siyang weirdo o minsa’y luka-luka sa ayos at pananamit. Ang bottom line nga’y gawin mo ang gusto mo kahit kailan at kahit saan. ’Yan ang sikreto ng ligaya sa buhay.

Meron ding ginagawang make over sa show sa Great Hair Day, pakiki-party at gimikan sa Sosyalan Blues at ang pagtuturo sa ere ng iba’t ibang crafts na maaaring libangan at pagkakitaan sa Ka-Q How To.