Magkaiba na ng mundo pero. young actress kinikilig pa rin sa ex na young actor

Diretsong sinabi ni Angeli Pangilinan, hipag ni Sharon Cuneta, na ang isyung naglalagay sa kanyang kapatid sa hindi kagandahang posisyon ay politically motivated.

Para sa misis ni Gary Valenciano na kapatid ni Senator Kiko Pangilinan ay gawa-gawa lamang yun ng mga kampong gustong siraan ang senador, madiin din nitong sinabi na hindi womanizer ang kanyang kapatid, wala raw anak sa ibang babae ang senador na tulad ng napapabalita.

Kahit si Gary V. ay nagsabing wala talagang nangyaring problema sa pagitan ng mag-asawang Sharon at Senador Kiko, kung meron daw, ’di sana’y pinagmitingan na yun ng buong pamilya.

Ganun daw sila kapag may problemang malaki, nauupo sila para balansehin at ipagdasal ang pangyayari, pero sa kaso nina Sharon at Senador Kiko ay wala talagang naging problema para upuan nila.

Isa lang ang ibig sabihin ng pangyayari, hanggang ngayon ay nakatutok pa rin ang publiko sa buhay ng Megastar, isang positibong pangyayari na hindi na nagaganap sa ibang mga artistang kakontemporaryo niya.

* * *

Isang kaibigan naming matagal nang naninirahan sa ibang bansa ang nakasagap ng kuwento tungkol sa isang dating magkarelasyong batang aktor at batang aktres.

Kuwento ng aming kaibigan, hanggang ngayon daw pala ay may pagtingin pa rin ang young actress sa kanyang ex, nung mapabalita raw kasing darating dun ang young actor para mag-show ay kinausap agad ng young actress ang kanyang mga kaibigan para sama-sama silang manood ng show ng dati niyang karelasyon.

“Ganun ang tingin namin sa kanya, mahal pa niya until now si ____(pangalan ng young actor) dahil may kilig pa rin kaming nakikita sa kanya kapag napag-uusapan na ang ex niya.

“Nalaman din namin na hindi naman pala sa kanya nanggaling ang pakikipaghiwalay dun sa young actor, outside forces pala ang gumawa nun, kaya naghiwalay sila na walang formal break-up talaga.

“Meron nang bagong karelasyon ang ex niya, meron na rin siyang bagong boyfriend ngayon, pero hanggang hindi kasi sila nagkakaroon ng formal break-up, meron pa rin silang feelings para sa bawat isa,” opinyon ng aming kausap.

Maraming naging problema ang dating magkarelasyong ito, kinontra ng mga tagahanga ng young actor ang relasyon nila ng young actress, pero nakipaglaban sila nang sabayan.

Habang kumokontra ang marami sa kanilang relasyon ay lalo namang tumibay ang pundasyon ng kanilang pagmamahalan, hanggang sa pumasok na sa eksena ang ilang taong may kuneksiyon sa batang aktres.

Minanmanan talaga ng mga ito ang lahat ng galaw ng batang aktor, naghanap ng butas ang mga ito para ipamukha sa batang aktres na niloloko lang siya ng kanyang boyfriend, hanggang sa pati siya ay nakumbinse na rin sa gustong mangyari ng mga taong nagmamalasakit sa kanya.

Pero ayon nga sa aming source, kung dudukutin natin ngayon ang puso ng batang aktres ay ang batang aktor pa rin ang laman ng kanyang puso.

Ang batang aktor naman ay may maayos nang relasyon ngayon, hindi taga-showbiz ang kanyang girlfriend, tahimik ang babae at hindi mahilig umeksena.

Kinontra rin ng mga tagahanga ng batang aktor ang babae pero hindi nagtagumpay ang mga kumontra sa kanila, mahusay nang humawak ng relasyon ang young actor ngayon. Hindi na ito nakikinig sa sulsol, kaya nagtatagal ang kanyang mga huling relasyon.

Sa totoo lang!